Universidade Nacional Timor Lorosa’e (UNTL), liuhusi Faculdade de Medicina e Ciências da Saúde (FMCS), Departamento de Parteira (DP), realiza semináriu nasionál ho tema “Hamutuk Kuidadu Saúde Inan ho Oan: Kolaborasaun Governu, Profisionál Saúde no Setór Akadémiku”, iha Salaun INSP-TL, Comoro, Díli (24/09).
Iha abertura, Vise-Reitora ba Asuntu Estudantís, Profesora Bia Ble Hitu Carvalho de Jesus, hatete katak valor atividade ne’e atu hametin diálogu no kompromisu.
“Semináriu ida-ne’e la’ós de’it sai espasu atu aprende, maibé mos sai espasu ba diálogu no kompromisu entre ita hotu. Ita presiza kontinua servisu hamutuk ho parseiru sira atu promove saúde materna-infantíl ne’ebé ho kualidade, liuliu bazeia ba respeitu dignidade no protesaun ba vida umana”, hatete Profesora Bia.
Vise-Prezidente Komisaun Organizadora Profesora Etelvina José S. Tilman, hatete katak eventu ne’e atu fahe koñesimentu, troka ideia no hametin kolaborasaun hodi hadi’a kuidadu saúde inan no oan.
“Tema ida-ne’e importante tebes, tanba saúde inan no oan la’ós responsabilidade instituisaun ida de’it, maibé presiza kolaborasaun prátika no partilla koñesimentu entre governu, profisionál saúde, instituisaun edukasaun no komunidade.
Atividade ne’e mos iha relasaun forte ho pilar tolu ensinu superior, liuliu iha área ensinu, peskiza no servisu ba komunidade”, hatete.
Melania Auxilia Pereira Lopes nu’udar estudante husi DP-FMCS-UNTL hatete oradór sira aprezenta materiál sientífiku ne’ebé relasiona ho profisaun parteira nian.
“Liuhusi semináriu ne’e, ha’u aprende buat barak, liuliu kona-ba kualidade servisu parteira iha sentru saúde no papél parteira nian. Koñesimentu ne’e sai matadalan ba ami atu implementa iha futuru”, hatete Melania.
Aleinde ne'e estudante husi Universidade da Paz (UNPAZ), Sandra Soares Maia, akresenta dehan, partisipa iha semináriu ne’e bele aprende ona kona-ba prátika no esperiénsia kuidadu saúde inan no oan.
“Semináriu ida ne’e loke ami-nia hanoin atu komprende liután kona-ba mortalidade inan iha Timor-Leste. Nu’udar futuru profisionál saúde, ami tenki iha koñesimentu kona-ba moras sira ne’ebé afeta inan, hodi bele fó solusaun bainhira hasoru situasaun hanesan ne'e iha futuru”, Sandra akresenta.
Partisipa husi Dekana FMCS, Profesora Lídia Gomes, reprezentante Ministériu da Saúde, Diretora Nasionál Saúde Materna no Infantil (SMI), Madalena Gomes, reprezentante INSP-TL, Diretór-Jerál Tékniku Espesífiku, Sr. Gregorio Rangel, Diretór Departamento de Parteira, Rafael dos Santos Ximenes, dosente no estudante UNTL, Instituto Superior Cristal (ISC), Instituto de Ciências da Saúde (ICS) no UNPAZ.
