Universidade Nacional Timor Lorosa’e (UNTL) liuhusi Faculdade de Medicina e Ciência da Saúde (FMCS) nia Curso de Farmácia realiza semináriu sientífiku ho tema “Política Farmácia em Timor Leste” hodi komemora loron Mundiál Farmácia ne’ebé sei selebra iha 25 Setembru, iha Auditóriu F-FDTL Fatuhada, Díli (22/09).
Reprezentante Dekana FMCS atuál Vice-Decano Para os Assunto Pesquisa Profesór Carlos Boavida hato’o agradesimentu ba organizadór sira, tanba iha inisiativa hodi realiza semináriu refere.
“Semináriu ne’e komemorasaun importante tebes ba estudante sira atu bele hetan informasaun kona-ba polítika Timor-Leste nian iha área farmaséutika hodi aumenta koñesementu estudante sira-nian ba pesoál saúde ne’ebé di’ak. Agradese mós ba oradór sira ne’ebé sei partilla informasaun importante ba estudante sira”, Dehan Profesor Carlos.
Iha fatin hanesan Prezidente Komisaun Organizadora António Tonito Ximenes hatete, objetivu husi semináriu ne’e atu komemora loron mundiál farmácia hodi konvida oradór sira mai partilla importánsia profisionál farmaséutika iha Timor-Leste.
“Semináriu ne’e hanesan opurtunidade ba estudante sira atu hetan informasaun klean kona-ba tema Polítika Farmácia iha Timor Leste ne’ebé sei aprezenta husi oradór sira. Hau espera ita bele aprende no hetan esperiensia foun hodi sai hanesan rekursu pesoal saúde iha futuru”, Dehan Nia.
Estudante Curso Farmácia Condareza Garcia orgullu, tanba hetan opurtunidade partisipa iha semináriu ne’e hodi hetan esperiensia foun.
“Ha’u sente orgullu bele partisipa iha semináriu ne’e hodi hatene klean oinsa rezolve problema stok aimoruk hotu lalais no oinsa atu kria sistema digitalizasaun ida hodi bele halo kontrolu ba aimoruk sira nomós ami bele hatene kria polítika ida hamutuk ho governu hodi responde ba nesesidade pasiente sira nian”, Dehan Condareza.
Iha sesaun semináriu ne’e oradór I Sr. Antonio Ximenes koalia kona-ba “Preparação Qualidade Recurso Humanos na Area Farmácia”, II oradór Sr. Delfin da Costa X. Ferreira koalia kona-ba “Política Regulação Atividades Farmacêuticos em Timor Leste” no oradór III Doutor Rui Maria de Araújo koalia kona-ba “Desafios é Perspetiva da Política Farmacêutica em Timor Leste.
Eventu ne’e realiza, tanba servisu hamutuk KO ho estrutura departamentu no fakuldade. Partisipa husi Prezidente Farmaseutiku iha Timor-Leste Sr. Guilherme dos S. Ximenes Soares, BSc Pharma, Diretór Deparatamentu, Dosente, Funsionáriu no Estudante husi UNTL, Univerdade da Paz, Universidade de Díli, Universidade Católica Timorense.
