Universidade Nacional Timor Lorosa’e (UNTL) liuhusi Faculdade de Medicina e Ciência da Saúde (FMCS) Escola Superior de Enfermagem (ESE) realiza kompetisaun modalidade Futsal ESE Cup 2026 ho tema “Hametin Unidade, Preserva Memoria no Harí Futuru Ida Nabilan”.
Vice-Reitora para os Asuntos Estudantís Profesora Dra. Bia Ble Hitu de Jesus Carvalho hato’o parabéns ba FMCS-ESE, tanba bele organiza atividade estrakurrikular ne’e ba estudante sira inklui mós estudante sira husi instituisaun privadu.
“Ita hatene katak atu hili jogadór di’ak tenke liuhusi atividade sira hanesan ne’e, nune’e bele hanorin estudante sira oinsa iha responsabilidade no servisu hamutuk iha ekipa ida”, Dehan Profesora Bia iha Kampu Futsal Bebora nian, Díli (14/09).
Iha fatin hanesan Prezidente Associação Académica Estudantil FMCS Arsénio Seixas Martins hatete, atividade ne’e atu kria lasu amizade entre estudante sira hodi kontribuisaun ba dezenvolvimentu.
“Atividade ida-ne’e konvida mós estudante sira husi universidade privada sira ne’ebé iha departamentu enfermagem. Eventu ne'e ita hotu nian, nu’udar ema akadémika ita tenki kontribui hodi bele la’o ho di’ak to’o remata”, Dehan Arsénio.
Jose Mario de Jesus Soares nu’udar Jogadór, hatete, atividade estrakurrikulár ne’e hala’o atu bele hametin lasu amizade estudante sira UNTL ho estudante sira instituisaun privadu.
“Objetivu husi futsal ESE CUP 2026 ne’e atu (1) komemorasaun loron istóriku 30 de Agustu, (2) kria lasu amizade entre estudante iha FMCS no husi Universidade privadu sira, (3) atu selebra 1° aniversáriu ba Assosiasaun Estudantil Departementu Escola Superior de Enfermagem”, Tenik atuál Xefe Asosiasaun Estudante ESE Jose.
Ekipa Jogadór sira kompostu husi ekipa mane hamutuk 30 no ekipa feto (13) husi UNTL, ICS, UNPAZ, ISC, UNDIL, UCT no UNITAL.
Partisipa iha abertura ne’e, husi Reprezentante Diretor-Geral da Reitoria Atuál Xefe Administrasaun Reitoria Sr. Rogerio Perreira, Vice-Decano Assunto Estudantís FMCS Profesór Eduardo Crisogno Gaio, Policia Nacional Timor-Leste, funsionáriu, dosente no konvidadu sira.
