FMCS-ESE hetan re-avaliasaun síklu daruak

FMCS-ESE hetan re-avaliasaun síklu daruak

𝐔𝐍𝐓𝐋- 𝐅𝐌𝐂𝐒-𝐄𝐒𝐄 𝐇𝐄𝐓𝐀𝐍 𝐑𝐄-𝐀𝐕𝐀𝐋𝐈𝐀𝐒𝐀𝐔𝐍 𝐒Í𝐊𝐋𝐔 𝐃𝐀𝐑𝐔𝐀𝐊 - 1

Universidade Nacional Timor Lorosa’e (UNTL) liuhusi Faculdade de Medicina e Ciência da Saúde (FMCS) nia Escola Superior de Enfermagem (ESE) hetan ona re-avaliasaun síklu daruak husi ANAAA (Agência Nacional para a Avaliação e Acreditação Académica).

Reprezentante Magnífiku Reitór atual Pró-Reitor para os Assuntos de Garantia de Qualidade (PRAGQ), Profesór Ruben Jerónimo Freitas hatete, avaliasaun ne’e fó hanoin atu UNTL nia departamentu sira tenki iha kualidade ensinu ne’ebé di’ak.

“Ohin ne’e momentu espesial Ita atu haree pasu espesial ne’ebé UNTL halo ona bazeia ba rekomendasaun ne’ebé iha avaliasaun anterior no agora atu simu tan saida mak ANAAA atu mai hodi hadia kualidade ensinu hodi produz graduadu sira ne’ebé atu responde ba merkadu traballu nian ba dezenvolvimentu Setór Saúde iha TL”, Dehan Profesór Ruben.

Reprezentante Diretór Ezekutivu ANAAA Assistente Oficial Qualidade ANAAA Sra. Anita de Araújo Soares hatete, avaliasaun ne’e hala’o tinan lima tuir lei ne’ebé iha.

“Ita-nia avaliadór sira ne’e husi nasional no internasional atu bele identifika progresu sira liuhusi entrevista, haree dokumentu, publikasaun ba peskiza no fasilidade sira hodi fó rekomendasaun ba saida mak presiza atu hadia ba futuru”, Dehan Sra. Anita.

Diretór ESE Profesór Virgilio Soares hatete, liuhusi avaliasaun refere, espera bele hetan rezultadu di’ak.

“Ami-nia preparasaun sira halo di’ak loos durante ne’e, no ohin mós ami hatan pergunta sira tuir buat ne’ebé ami prepara tiha ona no bazeia mós ba rekomendasaun sira ne’ebé iha avaliasaun anterior, ho avaliasaun ne’e ami bele hadia di’ak liu tan”, Dehan Diretór ESE.

Avaliasaun ne’e halo husi ekipa avaliadór internasionál na’in ida mak Prof. Setyawati, Ph. D no avaliadór nasionál na’in rua mak Dr. Florindo Cardoso no Dr. Mateus Pinheiro.

Partisipa husi Diretór-Jerál ba Asuntu Akadémiku, Sr. Armindo Fátima Leto, Dekana FMCS, Profesora Lidia Gomes, Vise-Dekanu sira, estrutura ESE, dosente, alumni no estudante sira.