Universidade Nacional Timor Lorosa'e (UNTL) nia Dekanu Faculdade de Filosofia e Ciências Humanas (FFCH) Profesór Faustino Soares, M. Hist, hala’o abertura Estájiu Sosiál no Pedagójiku (ESP) ba finalista hamutuk na'in 55, iha Kampus Sentrál UNTL, Díli (07/08).

“Estajiu sosiál mak oportunidade atu hatudu katak estudante UNTL iha kapasidade, disiplinadu no iha responsabilidade. Tanba ne'e, hau husu estudante sira hotu atu servisu ho didiak, kuidadu naran di'ak UNTL no hatudu komportamentu akadémiku ne'ebé bele sai ezemplu ba ema seluk”, hateten Dekanu FFCH.

Dekanu mós enfatiza katak estudante sira tenke hametin kultura servisu ne'ebé bazeia ba respeitu, kooperasaun no étika profissional atu aumenta esperiénsia no prepara an ba futuru profissional.

“Ita ba estájiu la'ós atu kumpri deit obrigasaun akadémika, maibé atu aprende, servisu hamutuk ho komunidade no fó kontribuisaun tuir ita-nia área estudu. Hatudu katak estudante UNTL bele sai ema ne'ebé iha kompeténsia no karakter di'ak”, dehan Dekanu.

Estudante na'in 55 ne’e sei distribui ba fatin oioin. Iha Munisípiu Dili iha estudante na'in ida. Iha Munisípiu Lautém iha estudante ema na'in 29, ne'ebé sei fahe ba Suku Pairara ema na'in 14 no Suku Serelau (15).

Enkuantu iha Munisípiu Baucau iha estudante ema na'in 24, ne'ebé sei distribui ba Suku Buruma (12), Suku Trilolo (12), no Eskola Sacrojes Vila Nova no ESG Nú. 1 Baucau (2).