Universidade Nacional Timor Lorosa'e (UNTL) nia Faculdade de Educação Humanidades (FEH) nia Departamento de Matemática (DEM) hetan re-avalia husi Ajénsia Nasional ba Avaliasaun no Akreditasaun Akadémika (ANAAA), hodi haree fali rekomendasaun ne’ebé ekipa avaliadór sira hato’o iha tinan lima liubá.

Iha diskursu Magnífiku Reitór Professor Dr. Joviano António da Costa, M. Eng. hatete avaliasaun ne’e importante tebes ba UNTL, tanba ekipa avaliadór sira sei hala’o prosesu avaliasaun ba programa estudu Matemátika.

"Programa estudu Matemátika hanesan estutu ba siénsia bázika ne’ebé sai fundamentu ba área koñesimentu hotu no importante atu sustenta dezenvolvimentu edukasaun, siénsia no investigasaun sientífika", dehan Magnífiku Reitór iha Videokonferénsia, Díli (24/06).

Iha fatin hanesan Presidente ANAAA Dr. Xisto Martins hatete, programa ne’ebé durante ne’e implementa ona kontinua lao di’ak no fó kontribuisaun ba dezenvolvimentu instituisaun.

"Prosesu akreditasaun ne’e la’ós ba dala uluk, maibé liu ona husi avaliasaun balu tanba ne’e, rekomendasaun sira husi avaliasaun anteriór tenke sai hanesan referénsia importante atu hadi’a servisu no hatudu progresu ne’ebé instituisaun halo to’o ohin loron. Tanba ne’e apresia esforsu husi ekipa lideransa no parte hotu", dehan Dr. Xisto Martins.

Diretór DEM Profesór Alfredo Pinto hatete, preparasaun ba avaliasaun ne’e bazeia ba rekomendasaun sira ne’ebé departamentu simu avaliasaun siklu dahuluk implementa ona.

"Rekomendasaun sira ne’ebé simu iha siklu dahuluk mak fasilidade, rekursu no peskiza, aspetu importante ne’ebé hetan atensaun mak laboratóriu ne’ebé eziste ona, maibé ekipamentu no materiál sira seidauk sufisiente, ita hadia kondisaun sira tuir rekomendasaun ne’ebé simu" dehan Diretór.

Partisipa husi Viseretór ba Asuntu Akadémiku Profesór Câncio Monteiro, Diretór Nacional Avaliação Qualidade Interna Sr. Agostinho Quelo, Ekipa Avaliadór husi Nasionál, estrutura fakuldade, dosente, estudante no alumni sira.