Universidade Nacional Timor Lorosa’e (UNTL), liuhusi Faculdade de Economia e Gestão (FEG), Departamento de Ciência Economia (DSE), realiza semináriu ho tema “Transformação Económica de Timor-Leste através de Economia Digital e da Economia Azul: Desafios, Oportunidade Estratégias para o Desenvolvimento Sustentável”, iha Auditóriu FEG, Díli (02/10).
Prezidente Komisaun DSE-FEG Lorenço P. de Araújo, hateten katak semináriu ne’e ho finalidade atu aumenta estudante sira-nia koñesimentu kona-ba Makroekonomia.
“Semináriu akadémiku ne’e liga ho matéria Makroekonomia ne’ebé ajuda ami, estudante sira, aumenta koñesimentu no kompriende liután aplikasaun matéria iha realidade, liuhusi esperiénsia prátika husi oradór sira”, dehan.
Diretor DSE Profesór António R. Moniz, hateten katak atividade ne’e fasilita estudante sira nia kapasidade profisionál hodi prepara ba futuru.
“Ha’u hein katak estudante DSE turma 2025 rona no partisipa iha semináriu ne’e ho atensaun, tanba materiál ne’ebé liga ho tema no matéria Makroekonomia bele ajuda imi kompriende diak liután situasaun no dinamika ekonomia Timor-Leste. Aleinde ne’e, koñesimentu ne’e importante atu estudante sira bele dezenvolve kapasidade, buka oportunidade no prepara an atu sai profisionál ne’ebé bele kontribui ba dezenvolvimentu ekonomia iha futuru”, tenik.
Oradór no atuál Xefe Departamento do Sistema de Pagamento e Financeira BCTL, Sr. Andre da Costa, hateten katak transformasaun ekonomia Timor-Leste presiza kolaborasaun husi parte hotu.
“Bazeia ba tema ne’e, transformasaun ekonomia Timor-Leste presiza haree ba oportunidade sira iha ekonomia dijital no ekonomia azul. Ho nune’e, estudante sira iha papel importante tebes, tanba sira mak sei sai profisionál no lider sira ne’ebé sei kontribui ba dezenvolvimentu ekonomia iha futuru”, dehan.
Estudante husi DSE Jesunia P. Amaral, hateten liuhusi sesaun semináriu, lori nia bele kompriende liután kona-ba ekonomia dijital no ekonomia azul.
“Iha semináriu ne’e, ha’u bele kompriende liután kona-ba oinsá uza teknolojia no inovasaun hanesan oportunidade ida atu dezenvolve ekonomia dijital no ekonomia azul. Ho koñesimentu ne’e, ami bele prepara an no kontribui ba dezenvolvimentu ekonomia iha Timor-Leste”, dehan.
