Universidade Nacional Timor Lorosa’e (UNTL) liuhusi Faculdade de Ciências Sociais e Políticas (FCSP) realiza formasaun ba estudante hamutuk na’in 386 molok ba Estájiu Servisu Sosiál (ESS), iha tinan akadémika 2026.

Dekanu FCSP Profesór Dr. Alarico Ximenes hatete, estajiu sosiál ne'e atu integra estudante sira ba sosiedade atu aprende hamutuk ho komunidade.

“Estajiu Servisu Sosiál ne'e la'ós de'it rekezitu akadémiku, maibé mós oportunidade integrál ba estudante sira atu rona, aprende, no fó solusaun ba dezafiu sosiál ne'ebé komunidade enfrenta. Nune’e bele aplika tuir imi-nia koñesimentu ne’ebé aprende iha kampus”, dehan Dekanu Ximenes iha Kampus FCSP, Caicoli-Díli (19/08).

Dekanu mós akresenta tan, formasaun ne’e foku ba dezenvolvimentu étika profisionál, kualidade peskiza, no téknika foti dadus iha terenu.

Estudante Juvita Alves husi Departamento de Administração Pública hatete, liuhusi formasaun atu rona orientasaun ba sira, antes tun ba ESS.

“ESS ne'e la'ós de'it foin hala’o, maibé kada tinan sempre realiza, atu estajiáriu sira bele implementa di'ak saida mak ami aprende ona durante ne’e, hodi ajuda sosiedade no buka solusiona hamutuk ba problema ne’ebé komunidade enfrenta”, Dehan Juvita.

Estudante 386 ne’e kompostu husi departamentu hitu, Departamento de Relações Internacionais (57), Departamento de Administração Pública (45), Departamento de Ciência Política (85), Departamento de Políticas Públicas (38), Departamento de Comunicação Social (65), Departamento de Desenvolvimento Comunitária (55), Departamento de Inclusão Comunitária e Sosial (35).