Universidade Nacional Timor Lorosa’e (UNTL), liuhusi Faculdade de Ciências Exatas e Naturais (FCEN), realiza eleisaun ba Asosiasaun Akadémika Estudante (AAE) ba períodu 2026–2028 iha salaun FCEN, Balide, Díli 17/07.

Eleisaun ne’e involve pakote rua, mak Pakote Núcleo no Pakote União Brilhante. Husi rezultadu eleisaun, Pakote União Brilhante mak sai vensedór atu lidera AAE FCEN ba mandatu tuir mai.

Prezidente Ezekutivu eleitu husi Pakote União Brilhante, Mejio de Jesus Almeida, hatete katak, sira sei implementa programa prinsipal haat durante períodu 2026–2028.

“Ami lori mai programa haat, hanesan kria Clubu estudu ba Matéria Matemátika, Fízika no Kímika atu aprofunda estudante sira-nia koñesimentu, tanba sira mai husi eskola oioin no presiza fortalese sira-nia baze. Ami sei organiza sesaun informativa no formasaun ho empresa sira, dezenvolve abilidade iha Lian Inglez no Portugés no kria grupu múzika ida iha FCEN, atu promove talentu estudante sira nian iha área múzika”, hatete Mejio.

Iha sorin seluk, Vise-Dekanu ba Asuntu Estudantíl FCEN, Profesór Mariano Amaral, hato’o parabéns ba pakote ne’ebé sai vensedór no husu atu asumi responsabilidade ho diak durante mandatu.

“Parabéns ba pakote ne’ebé sai vensedór no sei asumi knaar asosiasaun iha fakuldade. Konfiansa ne’ebé estudante sira fó tenke hatudu liuhusi implementasaun promesa sira, tanba sira sei sai lian no reprezentante ba estudante hotu-hotu iha Fakuldade, ida-ne’e mak misaun importante ida atu fó kontribuisaun ba dezenvolvimentu fakuldade,” hatete Prof. Mariano.

Vise-Dekanu Estudantís hato’o agradesimentu ba komisaun organizadora eleisaun AAE 2026 nian, ne’ebé servisu hamutuk ho Gabineti Vise-Dekanu ba Asuntu Estudantíl, konsege organiza eleisaun ne’e ho di’ak no susesu.

Rezultadu eleisaun hatudu katak husi total votante 215, Pakote Núcleo hetan votu 102, Pakote União Brilhante hetan votu 110, votu nulu ida no votu inválidu rua.