Universidade Nacional Timor Lorosa’e (UNTL), liuhusi Vise-Reitoria ba Asuntu Estudantís (VRAE) servisu hamutuk ho Fantiber Balance Academy (FBA), realiza workshop ho tema "Prepara ba Mundu Servisu". Atividade ne'e realiza iha Auditóriu Faculdade de Economia e Gestão (FEG), Díli (16/06).

Vise-Reitora Profesora Bia Ble Hitu Carvalho hateten, universidade prepara estudante sira ho kompeténsia atu bele kompete iha merkadu servisu.

“Estudante sira la presiza depende deit ba koñesimentu akadémiku. Sira tenke dezenvolve mós soft skills hanesan komunikasaun efetiva, servisu iha ekipa, lideransa, disiplina no responsabilidade. Nunee nafatin enkoraja estudante finalista sira atu aproveita formasaun no atividade dezenvolvimentu kapasidade atu prepara an ba merkadu servisu", dehan VRAE.

Managing Director Fantiber Balance Unipessoal, Lda., Sr. Fanny Junaedi, hato’o apresiasaun ba universidade, tanba fó oportunidade ba instituisaun atu hamutuk dezenvolve kapasidade estudante sira-nian.

“Ami agradese ba UNTL, tanba fó oportunidade atu servisu hamutuk no partilla esperiénsia ba estudante sira. Ami observa katak estudante barak presiza iha esperiénsia no abilidade prátika ne’ebé merkadu servisu presiza", dehan Diretora Fanny.

Iha sorin seluk estudante finalista Zacarias de Jesus, husi Faculdade de Turismo, Artes, Indústrias Criativas e Culturais (FTAIC), Departamento de Comércio e Turismo (DCT), hato’o katak formasaun ne’e fó benefísiu boot ba estudante sira atu prepara an di’ak liu ba mundu servisu.

“Formasaun ne’e ajuda tebes ami atu komprende oinsa prepara an ba entrevista servisu, prepara Curriculum Vitae (CV) ne’ebé di’ak, komprende realidade merkadu servisu no dezenvolve soft skills hanesan komunikasaun, konfiansa-an no atitude profisionál. Esperiénsia prátika ne’e importante atu ami bele prontu hodi hasoru dezafiu iha futuru”, dehan Zacarias.