Universidade Nacional Timor Lorosa’e (UNTL), liuhusi Faculdade de Agricultura (FAGRI) nia Departamento de Agronomia hetan re-avaliasaun ba siklu daruak husi Ajénsia Nasionál Avaliasaun no Akreditasaun Akadémika (ANAAA).
Vise-Reitór ba Asuntu Akadémiku Prof. Dr. Câncio Monteiro hatete, UNTL ho ANAAA kontinua iha kolaborasaun di’ak hodi halo preparasaun no hadia rekomendasaun sira husi akreditasaun dahuluk iha tinan 2019 liuba.
“Durante ne’e, universidade kontinua halo kolaborasaun diak ho ANAAA, liuhusi preparasaun no koordenasaun ne’ebé diak, to’o agora ita bele kontinua tama ba avaliasaun siklu daruak.
Ohin departamentu halo ona apresentazaun no momentu hanesan simu mós rekomendasaun balun husi ekipa avaliadór, nune’e sei sai hanesan referénsia importante ba universidade no departamentu atu hadia hodi garante kualidade akadémiku”, hatete Prof. Câncio, iha Kampus Hera, Díli (13/8).
Ofisiál Garante Kualidade husi ANAAA, Sr. Paulino Saldanha, hatete katak prezensa ANAAA iha FAGRI atu avalia fali progresu husi rekomendasaun sira ne’ebé antes ne’e fó ba Departamento de Agronomia.
“Ohin ita mai fali iha FAGRI iha Departamentu Agronomia, atu halo re-akreditasaun no haree detalladamente progresu durante tinan lima ikus.
Avaliasaun ne’e haree aspetu sira hanesan kualifikasaun dosente, kapasidade estudante, kontéudu kurríkulu, laboratóriu, biblioteka no aspetu sira seluk ne’ebé relevante ba kualidade akadémika”, hatete Sr. Paulino.
Iha fatin hanesan, Diretora Departamento de Agronomia, Profesora Donata Olandina de Araújo, hatete katak departamentu hadia ona rekomendasaun sira ne’ebé ekipa avaliadór hato’o ona iha prosesu avaliasaun dahuluk.
“Avaliasaun ba departamentu, loloos, iha tinan kotuk ami prepara hotu ona. Bainhira ami simu informasaun katak avaliasaun muda mai tinan ida-ne’e, preparasaun sira ne’ebé ami halo durante ne’e liga liu ba rekomendasaun sira, hanesan hadia fasilidade sira, laboratóriu no bainhira ami muda mai iha Hera iha espasu luan hodi ajuda tebes ami atu instala espasu laboratóriu no fasilidade sira seluk ba melloramentu kualidade ensinu iha departamentu”, hatete.
Re-avaliasaun ne’e halo husi ekipa avaliadór internasionál na’in ida mak Prof. Dr. Agr. Sc. Ir. Hagus Tarno, SP., MP., husi BAN-PT, no avaliadór nasionál na’in rua mak Dr. Mariano Odete do Céu Guterres no Sra. Marcia Exposto e Silva.
Partisipa husi Vise-Reitór ba Asuntu Garantia Kualidade, Profesór Ruben Jerónimo Freitas, Diretór-Jerál ba Asuntu Akadémiku, Sr. Armindo Fátima Leto, Dekanu FAGRI, Prof. Dr. Graciano Soares Gomes, Vise-Dekanu sira, estrutura Departamento de Agronomia, dosente, alumni no estudante sira.
