Universidade Nacional Timor Lorosa’e (UNTL), liuhusi Faculdade de Agricultura (FAGRI), nia Departamento de Saúde Animal (DSA), hala’o palestra ba Estájiu Klínika Profisionál (EKP) ba estudante hamutuk na'in 47, durante loron rua 6 to’o 7 Agostu, iha Salaun Enkontru FAGRI, Hera, Díli (7/8).

Palestra ne’e atu introdús programa no mekanizmu implementasaun Estájiu Klínika Profisionál (EKP), ne’ebé sei realiza durante fulan haat, husi loron 10 Agostu to’o 10 Dezembru 2026, ho komunidade sira iha Munisípiu Bobonaro. Área implementasaun EKP iha Suku mak hanesan Aidabaleten ho Rairobo iha Postu Administrativu Atabae, no Suku Ritabou ho Raifun iha Postu Administrativu Maliana.

Durante programa EKP, estudante sira sei implementa atividade oioin, hanesan halo vasinasaun ba komunidade sira-nia animal, hala’o sosializasaun kona-ba sistema hakiak animal ne’ebé di’ak no prevensaun ba moras animal sira, nune’e mos hala’o peskiza ba sira-nia monografia.

Palestra ne'e partisipa husi estrutura DSA, dosente sira no estudante finalista sira ne’ebé sei tuir programa Estájiu Klínika Profisionál.