Universidade Nacional Timor Lorosa’e (UNTL), liuhusi Faculdade de Agricultura (FAGRI), nia Departamento de Saúde Animal (DSA), hetan re-avaliasaun ba siklu daruak husi Ajénsia Nasionál Avaliasaun no Akreditasaun Akadémika (ANAAA).
Visereitór ba Asuntu Akadémiku Profesór Dr. Câncio Monteiro hatete, prosesu avaliasaun ne’e sai oportunidade ba DSA, atu haree no avalia progresu servisu ne’ebé hala’o ona durante tinan lima liubá.
“Avaliasaun ne’e oportunidade di’ak ba ami atu haree fali progresu ne’ebé ami halo hafoin avaliasaun iha tinan lima liubá. Nune’e mos identifika área ne’ebé sei presiza hadia tan, hodi reafirma ami-nia kompromisu atu fó edukasaun ho kualidade ba estudante sira no kontribui ho signifikativu ba dezenvolvimentu nasionál”, hatete Visereitór iha Kampus FAGRI-Hera, Díli (17/08).
Diretór Ezekutivu ANAAA, Nilton Paiva Mau, esplika katak ekipa avaliasaun ba DSA atu hametin no garante kualidade akadémika.
“Ohin ita tama ona ba siklu daruak. Signifika katak tinan lima liubá, DSA liu ona prosesu avaliasaun no akreditasaun. Agora, ami mai fali atu haree progresu ne’ebé DSA halo ona bazeia ba rekomendasaun sira ne’ebé avaliadór sira fó iha tinan lima liubá.
Ami mai ne’e la’ós atu buka sala, maibé atu ajuda malu, haree servisu ne’ebé ita halo ona no haree progresu kona-ba kualidade”, hatete Diretór.
Diretór DSA, Profesór Abrão José Pereira, hatete, simu ho kontente prosesu re-avaliassaun ne’e, tanba oportunidade atu hetan feedback husi avaliadór sira kona-ba kualidade akadémika.
“Ami hakarak hetan feedback husi avaliadór sira husi fatin seluk, atu ami bele hatene liután kona-ba kualidade akadémika. Ami mós espera atu hetan sujestaun no rekomendasaun husi sira, hodi bele hadia di’ak liután iha futuru”, hatete Profesór Abrão.
Prosesu re-avaliasaun ne’e hala’o husi ekipa avaliadór na’in tolu, kompostu husi avaliadór internasionál Prof. Dr. Agr. Sc. Ir. Hagus Tarno, SP., MP., husi BAN-PT, no avaliadór nasionál mak Dr. drh. Manuel da Costa, MSi, no Sr. Jonio dos Santos, Lic. Tec. Agr. M. Agr.
Partisipa husi Proreitór ba Asuntu Garantia Kualidade, Prof. Ruben Jerónimo Freitas, Dekanu FAGRI, Prof. Dr. Graciano Soares Gomes, Vise-Dekanu sira, estrutura no dosente DSA, alumni no estudante sira.
