Universidade Nacional Timor Lorosa’e (UNTL), liuhusi Vise-Reitora para os Assuntos Estudantís (VRAE), Profesora Dra. Bia Ble Hitu Carvalho, no Xefe Estadu-Maior Jenerál F-FDTL, Tenente-Jenerál Falur Rate Laek, Asosiasaun Estudante Hadomi Natureza (ESHANA), halo abertura ba marsa (lao-ain) husi Kararas to’o Foho Matebian-Baucau, hodi komemora loron FALINTIL ba dala 51 (20 Agustu 1975-2026).

Reprezentante Magnífiku Reitór no atuál VRAE, Profesora Dra. Bia Ble Hitu Carvalho agradese ba F-FDTL, tanba bele apoiu ona iha prosesu sira no marsa ne’e importante atu tranzmite memória luta FALINTIL, hametin patriotizmu no identidade nasional ba estudante sira.

“Ami agradese ba F-FDTL, tanba kooperasaun ne’ebé diak. Marsa ne’e sai oportunidade ba estudante sira atu aprende husi istória luta FALINTIL no hametin patriotizmu, unidade no responsabilidade ba nasaun”, dehan Profesora Bia iha Quartel Geral, Falintil-Forsa Defeza Timor-Leste (F-FDTL), Fatuhada, Díli (13/08).

Tenente-Jenerál Falur Rate Laek, Xefe Estadu-Maior Jenerál F-FDTL, hatete, joven tenke iha orgullu ba istória nasaun no aprende husi luta jerasaun uluk, atu bele kontinua kontribui ba Timor-Leste liuhusi edukasaun, koñesimentu, disiplina no servisu.

“Marsa ESHANA ne’e símbolu luta jerasaun foun. Se jerasaun uluk luta ho korajen no sakrifísiu hodi hetan liberdade, ohin juventude tenke kontinua luta liuhusi edukasaun, koñesimentu no servisu ba nasaun. Ita tenke orgullu ho ita-nia istória no valoriza sakrifísiu jerasaun uluk”, dehan Xefe Estadu.

Koordenadór ESHANA-UNTL Inocêncio Mauputar C. de Deus hatete, atividade lao-ain ne’e organiza hodi valoriza istória luta FALINTIL, hametin espíritu patriotizmu, unidade no solidariedade entre estudante sira, no haburas kultura hadomi natureza.

“Marsa ne’e la’ós de’it atividade fízika, maibé meiu ida atu estudante sira aprende no valoriza istória luta FALINTIL nian, hametin patriotizmu no responsabilidade ba nasaun”, hatete Inocêncio.

Estudante ESHANA-UNTL na’in 37 desloka ba Munisípiu Viqueque hodi hala’o marsa husi Aldeia Kararas, Munisípiu Viqueque, to’o Foho Matebian, Munisípiu Baucau, akompaña husi membru F-FDTL na’in-6.