Universidade Nacional Timor Lorosa’e (UNTL), liuhusi Faculdade de Ciências Exatas e Naturais (FCEN) nia Asosiasaun Akadémika Estudante (AAE), kolabora ho English Conversation Course Timor-Leste (ECC-TL) hodi promove estudante sira-nia abilidade liuhusi kursu Língua Ingleza.
Prezidente Ezekutivu AAE-FCEN, Mejio de Jesus Almeida, hatete kursu ne’e nu’udar programa AAE ne’ebé promete ona iha tempu eleisaun no agora realiza liuhusi parseria ho ECC-TL.
“Kursu ne’e ami loke ba estudante FCEN de’it. Estudante sira mós hakarak aprende, tanba natureza fakuldade, uza Lingua Portugeza. Maibé ita mós hatene katak Língua Ingleza mós importante ba nasaun hotu, no Timor-Leste adere ona ba ASEAN nune’e presiza duni abilidade Língua Ingleza”, hatete Mejio iha Kampus FCEN, Balide, Díli 28/09.
Iha fatin hanesan, Vise-Dekanu ba Asuntu Estudantil, Mestre Fernando Ximenes, dehan estrutura FCEN suporta inisiativa AAE nian ne’ebé fó oportunidade ba estudante sira.
“Ami, nu’udar estrutura fakuldade, apresia no suporta tebes inisiativa ida-ne’e husi asosiasaun, tanba formasaun hanesan ne’e bele fó oportunidade ba estudante sira atu dezenvolve an no hakle’an sira nia kapasidade iha Língua Ingleza”, hatete Mestre Fernando.
Iha sorin seluk, Prezidente ECC-TL, Estefânia G. S. Mendes, haktuir katak sira-nia grupu voluntáriu foka liu ba aprendizajen Língua Ingleza liuhusi ECC Sharing Project, ne’ebé fahe koñesimentu ne’ebé sira aprende ona ba komunidade.
“Ami nia kursu foka liu ba konversa Língua Ingleza, lahanorin matéria hanesan gramátika, maibé ami fahe tópiku ba hodi guia sira ba debate, diskusaun no aprezentasaun individual uza lian Inglesa”, hatete Estefânia.
Estudante FCEN, Maximilania A. S. Yon, hatete katak nia kontente, tanba hetan oportunidade atu hadi’a abilidade iha Língua Ingleza.
“Ha’u kontente tebes, tanba hetan oportunidade ida ne’e atu aumenta ha’u-nia abilidade iha Língua Ingleza. Lian ne’e importante tebes, liuliu atu uza iha momentu sira ne’ebé presiza”, hatete Maximilania.
Kursu ne’e sei hala’o durante fulan tolu, hahú husi 19 Setembru – 21 Novembru. Estudante sira sei aprende no prátika ko’alia Língua Ingleza, lideransa no matéria sira seluk ne’ebé relevante ba dezenvolvimentu sira nia kapasidade.
