Universidade Nacional Timor Lorosa’e (UNTL), nia Vice-Reitor para os Assuntos Académica (VRAA), Prof. Câncio Monteiro abertura formasaun kona-ba Internal Quality Assurance (IQA), Annual Progress Report (APR) no Self-Assessment Report (SAR), ne'ebe organiza husi Direção Nacional Avaliação Académica e Garantia da Qualidade Interna (DNAA-GQI), iha Polo Universitáriu Liquica, Maumeta (12/10).
“Workshop no mini-formasaun ne’e oportunidade importante atu aumenta funsionáriu sira-nia koñesimentu hodi hametin sistema garantia kualidade interna iha UNTL, liuliu iha prosesu avaliasaun no akreditasaun programa akadémiku. Liuhusi kolaborasaun entre Reitoria, departamentu no dosente sira, atu hadi’a kualidade edukasaun superior no hametin universidade nia reputasaun”, dehan VRAA.
Diretór DNAA-GQI, Prof. Antonio Ximenes, hateten katak workshop no mini-formasaun interna ne’e importante atu hasa’e koñesimentu no garantia kualidade akadémika.
“Workshop no mini-formasaun interna ne’e atu hasa’e koñesimentu no kapasidade funsionáriu sira kona-ba garantia kualidade akadémika, liuliu elaborasaun Self-Assessment Report (SAR) no Annual Progress Report (APR), atu bele transmite koñesimentu ne’e ba fakuldade no programa sira iha UNTL”, dehan Diretór DNAA-GQI.
Xefi Departamentu Avaliasaun no Akreditasaun, Sra. Judith A. B. Assis, hateten katak formasaun ne’e ajuda aumenta ona koñesimentu no kapasidade iha servisu.
“Ha’u sente katak formasaun ne’e ajuda aumenta ha’u-nia koñesimentu kona-ba relatóriu progresu anuál no avaliasaun institusionál. Koñesimentu ne’ebé ha’u hetan durante formasaun ne’e sei fó benefísiu ba preparasaun avaliasaun programa no institusionál iha UNTL iha tinan 2026.
Ha’u mós sei aplika koñesimentu ne’e iha servisu no fahe ba kolega sira iha fakuldade sira hodi hametin garantia kualidade akadémika iha universidade”, nia hateten.
Akompaña husi Administrador Geral (AG), Prof. José Dionísio Ximenes, Pro-Reitor para os Assuntos Garantia Qualidade (PRAGQ), Diretór sira, Chefe Departamento Avaliação e Acreditação (DAA), Chefe Departamento Formação e Diseminacão (DFD) no funsionáriu sira.
