Universidade Nacional Timor Lorosa’e (UNTL) liuhusi Faculdade de Educação e Humanidade (FEH) nia Departamento de Ensino de Fisíca (DEF) partisipa iha espozisaun hodi partilla koñesimentu prátiku ba komunidade kona-ba utilizasaun fugaun solar, enerjia eletrisidade husi bee masin, equilibrio dos corpos rígidos, iha Postu Administrativu Vemasse, Baucau (30/08).
Diretora DEF Profesora Maria Lia F. Freitas hatete, matéria ne’ebé aprezenta iha espozisaun ne’e bazeia ba rezultadu prátika estudante sira-nian.
“Objetivu husi atividade ne’e atu hatudu katak, siénsia, liu-liu físika, la’os de’it matéria ne’ebé ita aprende iha sala aula ka laboratóriu. Siénsia Fízika bele sai feramenta ida, atu ajuda komunidade kompriende ambiente.
Uza enerjia ho di’ak kria teknolojia simples, rezolve problema no buka solusaun sustentável ba moris lorloron”, dehan Diretora Freitas relasiona ho Espozisaun ne’ebé organiza husi Autoridade Postu-Administrativu Vemasse iha ámbitu Komemorasaun Loron Konsulta Popular ba dala 27 (30 Agustu 1999-2026).
Vogal Associação Académica Estudante Departamento Agildo R. C. dos Santos agradese ba komisaun organizadora ne’ebé konvida ona estudante UNTL.
“Hanesan vogal departamentu sente orgullu, tanba bele hetan oportunidade ne’e hodi mai fahe ami-nia koñesimentu liuhusi espozisaun iha komemorasaun loron konsulta popular. Nune’e bele partilla koñesimentu liga ho siénsia Fízika ba alin estudante no komunidade Vemasse sira”, dehan Agildo.
Iha fatin hanesan, Koordenadora ba Espozisaun husi DEF Jizelsia Xavier Guterres sente kontenti, tanba bele hetan oportunidade iha espozisaun.
“Kontenti bele hetan oportunidade hodi mai fahe koñesimentu, ideia no kriatividade kona-ba siénsia ne’ebé aprende ona. Reasaun husi partisipante sira mós interesante no ativu husu perguntas kona-ba materia no demostrasaun ne’ebé ami aprezenta. Sira hatudu kuriozidade no interese atu hatene kona-ba espozisaun ne’e”, dehan Jizelsia.
Partisipa husi Prezidente Autoridade Baucau Sr. Veneranda Lemos ho nia komitiva, Amu Vigariu Paroquia Nossa Senhora da Graça, komunidade, estudante no konvidadu sira.
