Univiersidade Nacional Timor Lorosa'e (UNTL) liuhusi Faculdade de Ciências Sociais e Políticas (FCSP) nia Departamento de Comunicação Social (DCS) realiza semináriu internasional ho tema "Aprezentasaun Kreatividade no Obra Estudante Liuhusi Expozisaun, iha Auditóriu FCSP Caicoli, Díli (22/10).

Estudante DCS Ermina Soares Pinto hatete, husi semináriu ne'e nu’udar meiu ida hodi hetan koñesimentu no esperiénsia foun husi oradór sira.

"Buat ne'ebé ohin hetan husi oradór sira liuhusi semináriu ne'e mak ko'alia kona-ba dijitalizaun no artifisial intlijénsia no nia purjentu no investimentu ba sira ne'ebé utiliza husi nasaun sira inklui mós Timor-Leste, tanba ne'e senti kontenti bele hetan tan buat foun balu husi oradór sira”, dehan Ermina.

Iha fatin hanesan oradór husi SECOMS Sr. Augosto S. dos Reis hatete, liuhusi temátika ne'ebé partilla foku liu kona-ba dezenvolvimentu dijital iha Timor-Leste.

"Dezovolvimentu dijital iha setor AI ne'e presiza investimentu ne'ebé importante loos, tanba bele lori oportunidade ba ita nomós bele kria mós oportunidade ba joven sira liu-liu sira ne'ebé iha setor komunikasaun sosial, tanba ko'alia kona-ba AI ko'alia mós kona-ba komunikasaun.

Iha Timor-Leste ita sei hasoru difikuldade mak menus hela literasia dijital, ida mak investimentu ne'e rasik no seluk publiku nia konfiansa ba empreza seidauk iha, maibé ohin loron ita-nia utilizasaun rede sosial ne'e boot, enkuantu benefisiu ba ita ne'e seidauk iha", dehan Asesor Augusto.

Reprezentante SEKOMS ne’e mós husu ba estudante sira tenki hatene oinsá atu analiza dadus presiza buka hatene alvu, metas no indikador sira, tanba halo atividade ida tenki iha planu, liuliu kona-ba jornalismu dadus.

Eventu refere realiza tanba servisu hamutuk husi estrutura FCSP, DCS, Asosiasaun Estudante, Komisaun Organizadora no apoiu husi SEKOMS, Alumni, Sr. Lirio Fonseca.

Partisipasaun masimu husi estudante, DCS UNTL, UCTL, IOB, UNITAL, dosente no konvidadu sira.