Universidade Nacional Timor Lorosa'e (UNTL), nia Magnífiku Reitór Profesór Dr. Joviano António da Costa, M. Eng, asina akordu ho Diretór Ezekutivu Centro Nacional Chega (CNC), Hugo Maria Fernandes, hodi koopera iha área tolu (3) Desenvolve Kurríkulu, Rekursu Pertinenti no Peskiza konjunta.

"Kooperasaun ne'ebé halo foku ba Faculdade de Filosofia Ciência Humana, liuliu iha kursu foun ne'ebé foin loke, iha Kursu Istoria no Kursu Psikolojia nian", dehan Reitór iha Salaun Ian Martin, Infordepe Balide, Díli (15/10).

Diretór Ezekutivu CNC, Hugo Maria Fernandes hateten, asina nota entendementu ne’e, atu hametin kooperasaun entre instituisaun rua.

"Objetivu husi Kooperasaun ne'e, atu apoiu Departamento de História iha FFCH, hodi integra módulu Chega nian, kona-ba istória, direitus umanus, justisa tranzisional no edukasaun dame, iha prosesu aprendisajen tuir natureza fakuldade ida-idak nian iha UNTL", Dehan Diretór CNC.

Partisipa husi, Vise-Primeiru Ministru, Ministru Koordenador ba Asuntu Sosiais, Eng. Mariano Assanami Sabino, Dekanu FFCH Profesór Faustino Soares, M. Hist ho estrutura, Provedór Provedoria Direitus Humanus no Justisa, Sr. Virgilio da Silva Guterres, Dosente, Konvidadu no Estudante sira.