CEGDI kontinua fasilita formasaun ba …

CEGDI kontinua fasilita formasaun ba estudante sira

𝐔𝐍𝐓𝐋-𝐂𝐄𝐆𝐃𝐈 𝐊𝐎𝐍𝐓𝐈𝐍𝐔𝐀 𝐅𝐀𝐒𝐈𝐋𝐈𝐓𝐀 𝐅𝐎𝐑𝐌𝐀𝐒𝐀𝐔𝐍 𝐁𝐀 𝐄𝐒𝐓𝐔𝐃𝐀𝐍𝐓𝐄 𝐒𝐈𝐑𝐀 - 1

Universidade Nacional Timor Lorosa’e (UNTL) liuhusi Gabinete Vice Reitora para os Assuntos Estudantis (GVRAE) ho Centro Estudo de Genero Diversidade e Inclusão (CEGDI) servisu hamutuk ho FOKUPERS (Forum Komunikasaun Feto Timor-Leste) kontinua fasilita formasaun jéneru no kampus seguru ba estudante sira.

VRAE Profesora Bia Ble Hitu Carvalho de Jesus hatete, universidade atu forma sidadaun sira ho karakter ne'ebé iha integridade, étika no lideransa, atu bele kontribui ba dezenvolvimentu nasaun.

“Implementasaun asuntu jéneru no Programa Kampus Seguru reprezenta kompromisu institusional universidade desde kedas mandatu estrutura anterior sira to’o agora. Nune’e bele kria ambiente akademiku ne'ebé seguru, respeitu malu, inkluzivu no livre hosi kualkér forma violénsia, diskriminasaun, intimidasun, asédiu sexual ne'ebé viola dignidade ema nian”, Dehan VRAE iha auditoriu FEG nian, Díli (13/11).

Iha fatin hanesan Diretora CEGDI Profesora Dulce Martins da Silva, Ph.D hatete, universidade mak tenke sai fatin ba aprendizajen, no dezenvolvimentu akadémiku no tenke sai fatin seguru ba ema hotu atu hetan respeitu.

“Ita tenke rekoñese katak violénsia bazeia ba jéneru, asédiu seksuál, diskriminasaun, no forma violénsia sira seluk bele mós akontese iha ambiente universitáriu nia laran. Hirak-ne'e la'ós de'it asuntu pesoál ka privadu sira maka kestaun direitus umanus ne'ebé afeta ema ida-idak nia dignidade, moris-di'ak, dezempeñu akadémiku, no oportunidade sira”, Dehan Profesora Dulce.

Partisipa husi estudante FADIR, FEG no FCEN. Atividade ne’e realiza tanba servisu hamutuk GVRAE ho CEGDI no Gabinete de Apoio Sosiadade Civil (GASC) no FOKUPERS.