Universidade Nacional Timor Lorosa’e (UNTL), nia Magnífiku Reitór Prof. Dr. Joviano António da Costa, M.Eng., hamutuk ho Embaixador Portugal iha Timor-Leste Duarte Bué Alves atribui bolsu-estudu ne’ebé oferese husi Instituto Camões, I.P., ba bolseiru hamutuk na’in haatnulu (40) ne’ebé iha pestasaun akadémika di’ak.
Reitór hato'o agradeseimentu sinseru ba Camões – Instituto da Cooperação e da Língua, I.P., no Embaixada Portugal iha Timor-Leste, ba apoiu ne’ebé kontinua fó ba estudante sira.
“Programa ida-ne’e hatudu katak kooperasaun iha área ensinu superiór bele produz rezultadu konkretu, liuhusi apoiu ba trajetoria akadémika joven sira no kontribuisaun ba dezenvolvimentu no kualifikasaun kapital umanu iha Timor-Leste", Dehan Reitor iha Centro Cultural da Embaixada de Portugal, Díli (l6/10).
Reitór husu ba bolseiru sira atu kontinua ho estuda, dedikasaun no sentidu responsabilidade, nune’e prepara koñesimentu, kapasidade no servisu ba interese komunidade ba futuru Timor-Leste.
Embaixador Portugál iha Timor-Leste S.E. Duarte Bué Alves hatete, kontribuisaun ne’e bele fasilita estudante bolseiru iha sira-nia prosesu estudu, tanba estuda iha universidade mós sai kompromisu ida ne’ebé envolve responsabilidade husi família, liuliu inan-aman.
“Liuhusi ami-nia kontribuisaun, ami hakarak estudante bolseiru na’in 40 ne’e bele iha kondisaun di’ak liután atu kontinua sira-nia estudu ho fasil liután ne'ebé ho sakrifísiu menus ba família sira”, dehan Embaxador.
Bolseiru husi Faculdade de Direito João Eudes Beno da Paixão hato’o agradeseimentu ba Camões.IP, dosente, família sira no ema hotu ne’ebé fó apoiu no akompaña iha prosesu ida-ne’e.
“Ohin, ami simu bolsa ida-ne’e ho gratidaun boot. Ami hein katak iha futuru, ami bele retribui konfiansa ne’ebé fó ona mai ami, liuhusi ami nia servisu, dedikasaun no kontribuisaun ba Timor-Leste”, dehan Nia.
Bolseiru sira-ne'e husi Faculdade de Educação e Humanidades (FEH) 12, Faculdade de Agricultura (7), Faculdade de Ciências Exata e Naturais (2), Faculdade de Engenharia Ciência Tecnologia (😎, Faculdade de Medicina e Ciências Saúde (3), Faculdade de Ciências Sociais e Políticas (2), Faculdade de Turismo, Artes Indústriais Criativas e Culturais (2), Faculdade de Economia e Gestão (2), Faculdade de Direito (2).
Partisipa husi Diretor Fundo de Desenvolvimento do Capital Humano (FDCH) Sr. Júlio Aparício, Vice-Reitor, Pro-Reitor, Dekanu sira, ekipa husi Camões – Instituto da Cooperação e da Língua, I.P., inan-aman, estudante no konvidadu sira.
