Universidade Nacional Timor Lorosa’e (UNTL) nia Magnífiku Reitór Interinu no atual Vice-Reitor Para os Assuntos Académicos (VRAA) Profesór Câncio Monteiro Ph.D, hamutuk ho Astomos Energy Corporation distribui bolsa estudu ba estudante hamutuk na’in 20, iha Auditóriu FEG UNTL nian, Díli (20/08/).

Iha diskursu Reitór Interinu, hato'o parabéns ba estudante hamutuk na'in 20 ne'ebé selesionadu husi fakuldade sanulu ne’ebé sai benefisiáriu ba bolsu estudu ne'e.

“Kontinua estuda ho dedikasaun, uza oportunidade ida-ne’e ho di’ak, halo imi-nia família no universidade orgullu. Uza koñesimentu ne’ebé imi hetan hodi kontribui ba dezenvolvimentu Timor-Leste”, dehan VRAA Monteiro.

Iha fatin hanesan, Embaixador Japaun iha Timor-Leste, Sr. Yamamoto Yasushi dehan, apoiu ne’e ba benefisiáriu sira atu ajuda kontinua sira-nia estudu, dezenvolve kapasidade no prepara futuru ne’ebé di’ak liután.

“Astomos Energy Corporation fó oportunidade ba estudante UNTL na’in 20 liuhusi programa bolsu estudu ne’e. Tanba ne’e, estudante sira tenke uza oportunidade ida-ne’e ho di’ak, dedika-an ba estudu, no kontinua esforsu hodi atinji imi-nia objetivu akadémiku no harii futuru ne’ebé di’ak”, dehan.

Reprezentante benefisiariu Rodrigues Mau husi Departamento de Relações Internacional-FCSP, hato’o agradesimentu ba Astomos Energy Corporation, tanba apoiu jenerozu no oportunidade ne’ebé fó liuhusi programa bolsa estudu ne’e.

“Apoiu ne’ebé Astomos Energy Corporation fó reprezenta kontribuisaun importante ba estudante sira, liuliu iha apoiu prosesu aprendizajen no dezenvolvimentu akadémiku.

Ami fiar katak parseria no kooperasaun entre UNTL no Astomos Energy Corporation sei kontinua hametin iha futuru, hodi fó benefísiu ba estudante sira no dezenvolvimentu edukasaun superior iha Timor-Leste”, hateten.

Partisipa husi reprezentante Ministério de Ensino Superior, Ciência e Cultura (MESCC) atuál Diretor-Geral Sr. Domingos Barros, Vice-Reitora para os Assuntos Estudantís Profesora Bia Ble Hitu, Pro Reitor para os Assuntos Cooperação Profesór Dr. Cristóvão dos Reis. Prezidente Astomos Energy Corporation, Sr. Toshinobu Sato ho nia ekipa, Dekanu Fakuldade, Diretór, dosente, estudante, família no konvidadu sira.