Universidade Nacional Timor Lorosa’e (UNTL), nia Proreitor Para os Asuntos de Cooperação (PRAC), Profesór Dr. Cristóvão dos Reis ho reprezentante husi Forsa Mariña Estadus Unidus (US Navy), Captain Tiffany Uranga lansa treinamentu iha área saúde ba estudante sira husi Eskola Teknolojia Saúde (ESTeS), iha Kampus Lahane, Dili (21/08).

“Programa ida-ne’e la'os de’it atividade akadémika, maibé mós oportunidade importante atu hametin kapasidade profisionál, disiplina, servisu ekipa no lideransa ba ita-nia estudante sira, tanba edukasaun no saúde mak fundamentu ba dezenvolvimentu Timor-Leste nian”, Dehan Proreitór Reis.

Proreitór mós enkoraja estudante sira atu aproveita oportunidade ne’e ho responsabilidade. Partisipa ativu durante prosesu treinamentu no tenke kaer metin ba valór sira ne’ebé sai prinsípiu importante iha UNTL, hanesan integridade, profisionalizmu, responsabilidade no kompromisu atu fó kontribuisaun ba sosiedade.

Dekana Faculdade de Medicina e Ciências da Saúde (FMCS) Profesora Lidia Gomes hatete, atividade formasaun prepara futuru profisionál saúde iha Timor-Leste.

"Formasaun ida-ne’e la’os de'it atividade akadémika ba tempu badak, maibé sai parte husi kompromisu hamutuk atu hametin kapasidade no rekursu umanu saúde ba futuru Timor-Leste.

Estudante sira ne’ebé partisipa mak futuru profisionál no sei kontribui iha sistema saúde nasional, inklui iha área farmásia, nutrisaun no dietétika, siénsia biomédika no servisu laboratóriu, atu kontribui ba hadi’ak kualidade servisu saúde ba povu Timor-Leste", Dehan Dekana Lidia.

Iha fatin hanesan Estudante Meliana Gama Carvalho sente orgullu no fó apresiasaun, tanba bele hetan oportunidade.

“Atividade sira-ne’e importante atu hasa’e ami-nia koñesimentu no abilidade kona-ba matéria farmásia, nutrisaun nomós matéria laboratóriu ne’ebé diferente no foun ba ami estudante sira. Agradese, tanba bele hetan esperiénsia foun husi oportunidade ne’e", dehan.

Iha atividade ne'e partisipa husi, dosente, funsionariu, estudante, no ekipa husi Navy.