Universidade Nacional Timor Lorosa’e (UNTL) nia Diretora Direção de Académicas das Unidades Curriculares Transversais (DAUCT) Profesora Cipriana Brites Dias hatete, dosente hamutuk na’in ruanulu-resin-hitu (27) mak hanorin matéria transversais ba fakuldade sanulu (10).

“Dosente transversais hamutuk 27 mak hanorin matéria jerál hanesan Portugés, Inglés, Tetun, Matemátika Bázika no Edukasaun Sívika. Dosente sira-ne’e, na’in ida bele hanorin turma 10, ne’e ita konsidera pezu ne’e as uitoan, tanba ne’e espera ba futuru ita bele aumenta dosente”, Dehan Diretora liuhusi entrevista iha knar fatin, Kampus Sentral, UNTL nian, Díli (18/05)

Iha sorin seluk, Profesór Paulino Fonseca hanesan Dosente Transversais, hanorin iha Faculdade de Economia e Gestão, dehan, maske hanorin materia jerál, maibé agradese tanba bele koloka dosente sira tuir área estudu.

“Universidade koloka ami tuir ami-nia área estudu. Ha’u hasai kursu iha Lian Inglés no ha’u hanorin Lian Inglés, hanesan mós kolega transversais sira seluk. Difikuldade uitoan ba ami mak, ema ida responsável ba turma 10 iha fakuldade rua to’o tolu kedas. Espera ba oin ita bele hanoin hodi rekruta tan dosente liuliu joven produtivu sira hodi kontribui di’ak liután ba kualidade ensinu iha UNTL”, dehan Profesor Paulino.