Universidade Nacional Timor Lorosa’e (UNTL) liuhusi Faculdade de Turismo, Arte, Indústrias, Creativas e Culturais (FTAICC), realiza judísium ho tema “Triada Turismu Sustentável ba Empoderamentu Komunidade no Natureza iha Timor-Leste” hodi atribui títulu lisensiatura ba finalista na’in 21 hodi prepara ba gradusaun.
Dekanu FTAICC, Profesór Doutór Feliciano Quintas do Céu dehan, diploma la’ós de’it símbolu husi susesu pesoál, maibé mós reprezenta responsabilidade boot atu kontribui ba komunidade no nasaun.
“Koñesimentu no esperiénsia ne’ebé imi hetan durante períodu estudu iha universidade tenke aplika ho étika, integridade no responsabilidade sosiál hodi kria mudansa positivu iha sosiedade.
Aleinde ne’e koñesimentu lokál, inovasaun no kapasidade profisionál importante hodi dezenvolve turismu sustentável, liu husi protesaun no valorizasaun patrimóniu kulturál no natureza Timor-Leste nian atu fó benefísiu ba komunidade no nasaun”, dehan Dekanu iha Salaun Nelayan, Bidau Lecidere, Díli (19/06).
Vice-Reitora para os Assuntos Estudantis (VRAE) Profesora Bia Ble Hitu de Carvalho hatete, graduadu sira tenke sai profisionál ho kapasidade atu lidera, halo inovasaun no fó kontribuisaun ba dezenvolvimentu Timor-Leste.
“Graduadu sira tenke promove turizmu responsável no sustentável, proteje patrimóniu kulturál no natureza, sai sidadaun ne’ebé ho responsabilidade fó servisu ba dezenvolvimentu no progresu nasaun.
Susesu iha mundu servisu la depende de’it ba kompeténsia téknika, maibé mós presiza profisionalizmu, étika, kreatividade no espíritu empreendedór. Valor sira-ne’e sai fundamentu importante hodi harii konfiansa, kredibilidade no respeitu iha ambiente servisu”, hatete Professora Bia Ble Hitu.
Iha sorin seluk reprezentante finalista Nicodemos Santa de Costa, L.CT, hatete, maski mai husi família agrikultór no hasoru dezafiu finanseiru la sai impedimentu atu kontinua luta hodi atinji nia mehi.
“Nu’udar estudante, ita hasoru dezafiu oioin iha prosesu aprendizajen no iha dalan atu atinji ita-nia objetivu, dezafiu sira-ne’e, ita hakarak ka lakohi tenke enfrenta ho korajen. Xave atu ultrapasa dezafiu sira mak pasiénsia. Pasiénsia la’ós buat ne’ebé ita halo dala ida de’it, maibé presiza kontinua iha loron ba loron. Ho pasiénsia no perseveransa, ita bele to’o ba vitória ne’ebé ita buka”, dehan Nicodemos.
Partisipa husi Diretór-Jerál Ministériu Turizmu, Sr. Antonio da Silva, estrutura FTAICC, dosente, funsionáriu, estudante no konvidadu sira.
