Universidade Nacional Timor Lorosa’e (UNTL) nia Faculdade de Educação e Humanidades (FEH) realiza judisium hodi distribui títulu akadémiku ba finalista hamutuk atus tolu hitunulu (370), iha salaun Delta Nova, Díli (17/06).

Reprezentante Magnífiku Reitór no atual Pro-Reitor para os Assuntos de Planeamento, Monitorização e Avaliação (PRAPMA) Profesór Tomas Soares Xavier hatete, hala’o estudu iha universidade la fasil presiza enerjia iha rekursu, koñesimentu, no enerjia ba an rasik.

“Momentu ida ne’e hanesan faze despedida entre estudante ho dosente sira liuhusi prosesu estudu iha UNTL ne’ebé hala’o durante tinan 4 ka 5. Iha tempu ne'eba estudante sira hasai enerjia no esforsu hodi alkansa futuru.
Difikuldade ne'e hotu mak ohin estudante sira bele to’o etapa ikus hodi konklui sira-nia estudu iha UNTL nune’e ho títulu ne’ebé imi simu bele uza hodi kontribui ba dezenvolvimentu nasaun”, Dehan Profesór Tomas.

Dekanu FEH Profesór Teodoro soares agradese ba inan-aman, dosente no funsionáriu sira ba dedikasaun, sakrifísiu no pasénsia tomak akompaña oan sira nia estudu iha universidade.

"Ha’u hakarak hato’o parabéns ba finalista sira no agradese ba parte hotu nia apoiu ba ita-nia oan sira ohin remata ona, maibé susesu hirak ne’e dala barak ema ladun valoriza. Maibé ha’u fiar katak iha futuru estudante finalista sira mós sei sai dosente, edukadór ka profisionál ne'ebé kontribui ba dezenvolvimentu nasaun", Dehan Dekanu.

Finalista husi Departamento do Ensino de Lingua Inglesa Maria Pascoela Boavida hatete momentu ne’e sai hanesan etapa importante iha moris, ne’ebé labele separa husi kontribuisaun no sakrifísiu husi família, liuliu inan-aman sira.

“Ami agradese ba inan-aman sira ba suporta, sakrifísiu no enkorazamentu, nomós ba dosente sira nia pasiénsia no dedikasaun ne’ebé durante akompaña ona ami iha prosesu aprendizajen to’o mai ohin loron”, Dehan Pascoela.

Partisipa iha serimónia solene refere, Diretór Departamentu, Estrutura FEH, dosente, inan-aman, estudante no konvidadu sira.