Universidade Nacional Timor Lorosa’e (UNTL) liuhusi Faculdade de Direito (FADIR) realiza serimónia Judisium ba dala-XXI ho tema “O Papel dos Juristas Para a Consolidação do Estado de Direito Democrático da RDTL”, hodi atribui títulu akadémiku ba finalista hamutuk na’in haatnulu resin ida (41), iha Salaun Comissão Nacional de Eleições (CNE), Díli (18/06).
Reprezentante Magnífiku Reitór no atual Vise-Reitora para os Assuntos Estudantís (VRAE) Profesora Bia Ble Hitu de Carvalho hatete, finalista sira remata ona parte importante husi sira-nia dalan akadémiku, liuhusi esforsu tinan barak ne'ebé sira dedika ho sakrifísiu.
"Ohin selebra loron espesiál ida-ne’e iha moris akadémiku husi ita-nia graduadu sira no rekoñese katak etapa ikus ba imi-nia estudu iha universidade. Agradese mós ba kompromísu husi joven sira ne’ebé hili direitu nu’udar instrumentu ba justisa, sidadaun no servisu ba nasaun ho esperansa ba Timor-Leste ida ne’ebé sai demokrátiku no komprometidu liután ho prinsípiu estadu direitu demokrátiku", dehan.
Iha fatin hanesan Vise-Primeiru Ministru, Ministru ba Kordenador Asuntu Sosiál no Ministru Interinu ba Ministériu Ensinu Superior Siénsia Kultura S.E Mariano Assanami Sabino hatete, konstrusaun estadu no dame sei loke dalan ba dezenvolvimentu liuliu ba estudante ne’ebé estuda área Direitu, iha responsabilidade importante atu hametin no hala’o estadu bazeia ba lei.
"Ita-nia nasaun hanesan nasaun demokrátika, tanba ne’e presiza estadu ida ne’ebé forte, ho lei ne’ebé implementa ho justisa. Atu hala’o justisa di’ak, presiza ema ho koñesimentu, konsiénsia, lideransa, responsabilidade no dedika-an alende ne’e mós atu sai jurísta la’ós buat fasil maibé presiza foti desizaun ne’ebé justu no servi ba povu", dehan Vise-Primeiru Ministru, S.E Mariano Asanami.
Seremónia Judisium ne'e partisipa husi reprezentante membru governu sira, dekanu ho estrutura FADIR estudante, inan-aman no konvidadu sira.
