Universidade Nacional Timor Lorosa’e (UNTL) nia Faculdade de Educação e Humanidades (FEH) nia Departamento de Ensino da Educação Física e Desporto (DEEFD) submete ona proposta ba Universidade hodi eleva diploma III ba lisensiatura.

Diretór DEEFD Profesór João Dias hatete, dadauk ne’e esforsu hela atu eleva husi nivel baixarelatu ba lisensiatura tanba ne’e, departamentu mós prepara ona kondisaun liuliu rekursu no fasilidade sira.

"Ita hakarak avansa ona ba lisensiatura hodi hanorin Ensinu Sekundariu sira. Tanba ami diploma III de’it labele asesu ba vaga bolsa kandidatura profesor sira hodi hanorin iha sekundariu. Dadaun ne’e ami esforsu hela atu responde ba kritéria sira hanesan, koopera ho FECT-UNTL atu utiliza sira-nia infraestrutura desportiva nian", Diretor esplika iha knar fatin Kampus Liceu, Díli (11/06).

Profesór ne’e dehan, identifika fasilidade desportivu hanesan voleibál, basketból, undeball, futsal, ténis meza, jinástika no trampolin, ekipamentu ba ezersísiu báziku hanesan atletizmu, saltu inklui ekipamentu arte marsiais, luta no boxing, tanba konsidera importante atu kompleta prosesu aprendizajen no prátika.

Diretór ne’e espera, liuhusi apoiu husi universidade, governu no parseiru sira, bele aumenta kualidade infraestrutura, kompleta materiál didátiku no reforsa kapasidade rekursu umanu, atu hamosu graduadu sira ne’ebé iha kompeténsia aas no prontu atu kontribui ba dezenvolvimentu desportu nasionál.