Universidade Nacional Timor Lorosa’e (UNTL) nia Faculdade de Filosofia e Ciências Humanas (FFCH) realiza Judisium ho tema “A Journey of a Thousand Milions Begins with One Step” hodi distribui títulu akadémiku ba finalista hamutuk na’in 8, iha Auditóriu FCSP- Caicoli, Díli (19/06).

Iha diskursu Reprezentate Magnífiku Reitór no atual Pró-reitor para os Assuntos Jurídico (PRAJ) Profesór Doutor José Tomás Alves hatete, susesu ne'e hanesan inísiu ba finalista sira hodi prepara ba karreira foun.

“Hato’o parabéns no haksolok ba kandidatu graduadu sira ne’ebé konsege remata ho susesu sira-nia estudu iha área Filosofia. Susesu ida-ne’e liuhusi esforsu no perseveransa atu kompleta disiplina sira iha kuríkulu", dehan Pró-reitor.

Iha fatin hanesan Dekana FFCH Profesora Me. Esmeralda Piedade de Araújo hatete, formasaun ne’ebé sira simu atu sai ema integradu ho hanoin ne'ebé krítiku atu serbí sosiedade.

"Hato’o agradeseimentu bo'ot ba inan-aman, família no ema hotu ne’ebé akompaña no fó apoiu ba kandidatu graduadu sira. Ho sakrifísiu, motivasaun no tulun ne’ebé ita bo'ot sira fó durante tempu estudu nian, ikus mai kandidatu graduadu sira konsege hetan rezultadu di’ak no to’o iha loron importante ida-ne’e", dehan Dekana FFCH.

Reprezentante finalista nu'udar mellór klasifikasaun Camilo Pinto hatete, selebra serimónia Judisium ida-ne'e, mak faze dahuluk molok atu ba serimónia graduasaun.

" Ohin loron importante ba ita hotu tanba eventu judisium ida-ne'e hanesan prosesu akadémiku ida hosi fakuldade atu determina ofisialmente katak estudante sira kumpre ona rekizitu hotu ne'ebé reprezenta iha universidade.
Ema ida nia prezensa iha mundu akadémiku remata, liuhusi faze foun ne’e, ita nu’udar ema inteletuál, ita sei hasoru dezafiu barak, maibé mós oportunidade sira ne'ebé mai ho responsabilidade no kapasidade inteletuál sira", dehan Camilo.

Partisipa husi Diretór Centro dos Direitos Humanos Profesór Armindo Maia, Dekana FFCH ho estrutura, dosente, funsionáriu, inan-aman no konvidadu sira.