Universidade Nacional Timor Lorosa’e (UNTL) liuhusi Asosiasaun Estudante Hadomi Natureza (ESHANA), servisu hamutuk ho Komisaun Justiça, Páz, Integridade no Criaçon (JPIC), organiza Expo Fashion Show no Arte Resiklajen ho tema “Lixo la'ós Problema, Maibé Inspirasaun” hodi selebra Loron Mundiál Ambiente iha Timor-Leste
Iha diskursu, Visereitora ba Asuntu Estudantis, Professora Dra. Bia Ble Hitu Carvalho, ne’ebé reprezenta ekipa reitorál, hato’o apresiasaun ba inisiativa no kreatividade estudante sira envolve an iha atividade ne’e.
“Ha’u hein katak asaun ida-ne’e labele para de’it iha ida-ne’e. Imi tenke implementa iha moris lorloron no sai embaixadór ambiente liuhusi asaun simples hanesan soe lixu iha nia fatin no mantein ambiente limpu”, dehan Visereitora iha Kampus FEG, Díli (05/06).
Nia mós hateten atividade ne’e aliña ho programa estratéjiku universidade nian no importante atu kontinua kolaborasaun ho Kompañia Caltech hodi fornese kaixa rekolla lixu plástiku iha fakuldade hotu.
Dekanu Faculdade Economia no Gestão (FEG), Profesór Filipe Mendes Pereira, dehan estudante FEG sira hala’o ona hosi tinan 2013 atu transforma FEG sai “Faculdade Livre hosi Plástiku”.
"Ha'u husu responsabilidade husi estrutura no estudante hotu atu lori duni espíritu ‘Hadomi Natureza’ ba asaun konkretu hodi hamos no proteje ambiente iha fakuldade, tanba mudansa ba ambiente di’ak presiza hahú hosi disiplina individuál no komitmentu kolektivu hosi komunidade akadémika tomak", dehan Dekanu FEG.
Reprezentante Prezidente Justiça, Paz e Integridade da Criação (JPIC), Sr. Afonso Guterres de Araújo, nu’udar inisiadór no apoiadór prinsípál ba programa ne’e, hato’o agradesimentu ba FEG ne’ebé fó espasu atu realiza atividade ne’e.
"Agradese ba dekanu ho estrutura tanba bele fó ona fatin hodi realiza atividade ne'e. Tanba ne’e lixu la’ós de’it rezídu atu soe, maibé bele transforma sai oportunidade, benefísiu no inspirasaun atu kria ambiente ne’ebé saudável no seguru ba futuru”, dehan Sr. Afonso.
Programa ne’e hanesan kontinuidade husi série atividade edukativa ne’ebé hahú ona iha loron 29 Maiu 2026, liuhusi workshop edukativu no vizita estudu ba Kompañia Caltech, hodi fó koñesimentu ba estudante sira kona-ba jestaun rezídu no importánsia preservasaun ambiente.
Partisipasaun husi Vise-Reitora ba Asuntu Estudantís, Professora Dra. Bia Ble Hitu Carvalho, Dekanu FEG Profesór Filipe Mendes Pereira, SE., MM., reprezentante JPIC Sr. Afonso Guterres de Araújo, koordinadór ESHANA, estudante UNTL sira, no reprezentante hosi eskola sekundária iha Dili.
