Iha diskursu Profesór Cristovão dos Reis dehan, sente orgullu, tanba iha tinan sanulu ba kotuk mak inisia sentru lian korea iha UNTL hodi fó biban ba estudante sira atu bele kapasita aan no estuda mós lian Korea nian hodi bele buka servisu no hala’o estudu.

“Ohin ha’u sente orgullu, tanba lian Korea ne’e agora la’o makaas tebes iha Timor-Leste, nune’e ita tenki agradese ba Governu Repúblika Korea ne’ebé tulun Timoroan sira barak ba servisu iha Korea no tulun dezenvolvimentu iha ita-nia rain. Liuhusi kompetisaun ne’e husu ba imi atu kontinua aprende, hatudu talentu hodi promove amizade”, Dehan Profesór Cristovão.

Iha fatin hanesan Prezidente Komisaun Organizadór Hipolito Bianco hateten, atividade ne’e atu selebra mós amizade Korea ho Timor-Leste.

“Ha’u hakarak hato’o onra boot ba konkorente diskursu lian Korea ba dala-2 ne’e, hodi halo selesaun manan na’in ida atu ba partisipa iha kompetisaun lian Korea mundiál badala-30 iha Korea do Sul iha loron 8 fulan Agostu”, Dehan Hipolito.

Atividade ne’e hetan apoiu husi Korea Fundation no NUAC-TL. Aleinde ne’e partisipa husi reprezentante Embaxada Korea, Sra. Park Hye Ri, HRD Korea, Voluntáriu KOICA, Izaldes Santana, Prezidenti Fundasaun Memorial Konis Santana (FMKS), sentru sira ne’ebé hanorin lian Korea, Ekipa Juri, Konkorente no konvidadu sira.