171903350 4061321203889234 1000018051998240710 n
UniversiDade Nacional Timor Lorosa’e (UNTL), liuhusi Fakuldade Enjeñaria, Siénsia no Teknolojia (FECT) nia estudante ne’ebé dadaun ne’e hela iha Dormitóriu Hera, halo asaun karidade liuhusi konstroi uma ba refujiadu hirak ne’ebé hamahan-an iha rezidensia Kongregasaun Kanosianu Hera, tanba afeita husi inundasaun ne’ebé akontese iha loron 4 Abril liubá.
 
Amu Kapelaun UNTL nian, Pe. Nívio Correia Lebre Fdcc, iha nia entrevista hateten katak, estudante sira ne’e kompostu husi Departamentu 5 ne’ebé eziste iha FECT mak halo asaun refere hodi apoiu vítima inundasaun nian, nomós espresa solidaridade universidade nian.
 
“Estudante FECT kompostu husi Departamentu 5, sira hakarak ho voluntariamente halo asaun karitativa ida, liuhusi koordenasaun ho Gabineti Proreitór ba Asuntu Provedoria no Akonsellamentu (PRAPA), husi asaun ida ne’e espresa mós solidaridade universidade nian ba vítima inundasaun ne’ebé lakon sira-nia hela fatin” tenik Amu Kapelaun.
Padre Nívio mós hatutan, uma ne’ebé konstroi ba vítima sira atu hela provizóriu, tanba barak mak ho labarik ki’ikoan no balun bebé foin moris.
Iha fatin hanesan, responsável ba konstrusaun Ajino Baptista hateten, nu’udar estudante hakarak halo asaun ruma ba vítima sira ne’ebé presiza tulun no aleinde konstrusaun, sira mós apoiu nesesidade balun ba vítima sira.
 
“Nu’udar estudante, haree ba inunadasaun ne’ebé akontese, ami hakarak hatudu ami-nia solidaridade, ami mós apoiu ona nesesidade balun, no ikus ami rona katak balun hela fatin laiha ona, ne’e mak ami konstrui fatin provizóriu ida ba sira iha ne’e, no estudante FECT ne’ebé hela iha Dormitóriu mak apoiu konstrui uma refere”, tenik Ajino.
 
Estudante ne’e mós hatutan, konstrusaun uma refere oras ne’e atinji ona 75%, no garante katak sei finaliza iha tempu besik atu nune’e vítima sira bele uza ona.
 
Totál refujiadu ne’ebé antes ne’e mai hela iha Rezidensia Kongregasaun Kanosianu iha Hera, hamutuk uma-kain hitunulu resin, maibé balun fila ona ba sira-nia hela fatin, no hirak ne’ebé sei hela hamutuk uma-kain haatnulu resin, tanba sira nia hela fatin hetan estraga totál husi inundasaun.
 
Média UNTL 📝: Agostinho da Cruz e Silva
Foto 📷: Agostinho da Cruz e Silva

Comment

1️⃣ Estudante sira ne’ebé iha nesesidade ka hakarak fila bá sira-nia Munisípiu no halo ona teste COVID-19 ho rezultadu negativu, karik presiza apoiu transporte husi UNTL tenke kompleta no submete formuláriu rejistu online liuhosi link tuir mai ne’e:
⬇️
2️⃣ Data no oras limite atu rejistu (ba estudante ne’ebé halo ona teste swab de'it): loron-kinta 29 fulan-Abríl tinan 2021, oras 17:30 (lokraik).
‼️ IMPORTANTE: estudante sira ne’ebé la rejistu tuir formuláriu ne’e, UNTL labele garante sira-nia transporte.
3️⃣ Estudante sira tenke ba diretu Sentru Integradu Jestaun Krize (SIJK) iha Centro de Convenções de Díli (CCD), hodi foti rezultadu no atestadu médiku nian, nune’e mós hetan guia-marxa.
4️⃣ Iha tempu besik tuir mai, UNTL sei fó sai avizu detalladu kona-ba viajen ba munisípiu.
✳️ Ami apela ba membru hotu husi Sívitas Akadémika UNTL atu kontinua tuir ho rigór medida ne’ebé fo-sai husi autoridade kompetente ba luta kontra pandemia COVID-19, liuliu distansiamentu fíziku no kuidadu espesiál ijiene no saúde.
✳️ Informasaun ofisiál Reitoria UNTL kona-ba pandemia COVID-19 sei kontinua fó sai de’it iha website www.untl.edu.tl no pájina Facebook UNTL nian
📢 Halo favór fahe no kumpre.
✅ Mai Ita Hamutuk Luta Kontra COVID-19! 💪
✅ Ita-nia Saúde Iha Ita-nia Liman Rasik! ✋
Reitoria UNTL

Comment

Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, MPH, Ph.D, akompaña husi Proreitora ba Asuntu Kooperasaun, Profesora Doutora Lídia Gomes, SKM, M.D. simu vizita husi S.E. Embaixadór foun Brazil nian iha Timor-Leste, Sr. Maurício Medeiros de Assis, iha Kampus Sentrál UNTL, Díli, (26/04).
 
Reitór UNTL nian, iha nia entrevista hateten, vizita kortezia ne’ebé hala’o atu koñese estrutura foun UNTL nian, no diskuti mós kona-ba kooperasaun instituisaun rua nian.
 
“Vizita Kortezia ne’e, sira hakarak koñese Reitór foun ho nia estrutura, no iha enkontru ne’e ami diskuti kona-ba kooperasaun sira entre UNTL ho Embaixada Brazil iha Timor-Leste liuliu sira-nia apoiu ba Programa Pós-Graduasaun no bolsa estudu ba timoroan sira”, tenik Reitór.
IMG 7024
 
Iha fatin hanesan, Sr Embaixadór Brazil nian hateten katak, nia vizita ba dahuluk mak instituisaun estadu nian maka UNTL tanba edukasaun nu’udar pilar importante iha kooperasaun ho Brazil.
 
“Esperiénsia di’ak lubuk ida iha pasadu no preparasaun ba projetu iha futuru, liuhusi Coordenação de Aperfeiçoamento de Pessoal de Nível Superior (CAPES), Brazil oferese programa rua hanesan, programa edukasionál liuhusi konvéniu ba estudante ho nível estudu lisensiatura no pós-graduasaun liuhusi bolsa estudu”, hatutan.
 
Média UNTL 📝: Mateus Goncalves
Foto 📷: Mateus Goncalves

Comment

Universidade Nacional Timor Lorosa’e (UNTL), Fakuldade Siénsia Sosiál (FCS) nia Sentru ba Direitus Umanus (SDU-Human Rights Centre) dezenvolve inisiativa aprende liuhusi via-dijitál (e-learning/online) atu kontinua fó treinamentu ba dosente sira, iha ámbitu pandemia COVID-19 no Serka-Sanitária.
 
Rezultadu mak “Introdusaun Direitus Umanus iha Sudeste Asiátiku” instrumentu foun ida ba edukasaun iha UNTL, ho lian Tetun, kombina aprende ho partisipasaun aula.
 
Kursu ida ne’e foku ba profesór no asistente sira UNTL nian, no kursu Direitus Umanus no Demokrasia foun iha UNTL.
 
Kursu ne’e hanorin husi dosente no peritu husi Global Campus of Human Rights, the ASEAN University Network (AUN-HRE), aleinde ne’e, no fasilita husi Tutór-Akadémika husi Sentru Direitus Umanus.
 
Inisiativu refere, atu kontribui instrumentu foun liuhusi treinamentu, ba inovasaun didátiku integrasaun Direitus Umanus Edukasaun liuhusi Fakuldade sira. Permite mos kriasaun ba dezenvolvimentu ba SDU- UNTL, iha etapa ne'ebé avansada, no daudaun ne'e presiza esforsu final ba integrasaun akadémika, administrativa, no finanseira iha estrutura Universidade nian.
 
Projetu ne’e implementa husi Jestór Projetu nian, Adriano Remiddi ho nia ekipa foun husi Sentru Direitus Umanus UNTL: Celso da Fonseca, Joanico Gusmão Alves, Juvita Pereira Faria, Senhorina dos Santos no Francelino dos Santos Serra. UNTL sei kontinua hetan apoiu husi Uniaun Europeia no Global Campus of Human Rights to’o Juñu 2022.
 
📽️ Bele asesu vídeo kona-ba SDU nian E-Learning iha link tuir mai ne'e:
 
Média UNTL 📝
Foto 📷: Arkivu UNTL Human Rights Centre Project

Comment

WhatsApp Image 2021 04 23 at 12.31.34#TimorLeste #UNTL #FCS #FMCS #FEAH #COVID19 #COVID19TL 23 Abril 2021
Universidade Nacional Timor Lorosa’e (UNTL),  Fakuldade Siénsia Sosiál (FCS) nia Dekanu, Profesór Camilo Ximenes Almeida, iha Kampus Kaikoli UNTL nian, Díli (22/4), hateten katak nia Fakuldade adia prosesu aprendizajen ba estudante foun tinan akadémika 2021 nian, no estudante tuan aula la’o ona.

“Fakuldade la realiza aula ba estudante foun sira tanba seidauk hasoru estudante sira dezde prosesu rejistrasaun, no difikuldade mós relasiona ho rede internet, situasaun ekonomia família nian, inklui Serka-Sanitária ne’ebé sira-nia labele hetan apoiu husi inan-aman sira iha munisípiu ” tenik Dekanu.

Dekanu mós akresenta katak Fakuldade nia solusaun mak adia estudante sira-nia materia iha semestre impár, no kontinua de’it ho semestre pár, enkuantu sira sei foti fali materia semestre ne’e nian iha inisiu tinan oin.

Relasiona ho asuntu ne’e, Dekanu FMCS nian, Profesór José Deonisio Ximenes, mós hato’o katak nia Fakuldade dezde abertura  online ba Tinan Akadémiku 2021, ne’ebé realiza iha 8 Abril, no fó posibilidade atu organiza aula liuhusi online ba estudante foun.WhatsApp Image 2021 04 23 at 12.29.30

“Hafoin prosesu la’o ita iha serka-sanitária no enfrenta mós inundasaun, maibé Fakuldade konsege organiza Departamentu sira, no Kursu Medisina Jerál mak aula ba estudante foun la’o ona iha semana liubá, enkuantu Departamentu seluk sei finaliza prosesu no semana oin bele la’o ona”, tenik.

Dekanu mós hatutan katak durante ne’e Fakuldade la iha problema no organizadu no difkuldade iha rede internét, maibé Fakuldade nia aula ba estudante tuan sira la’o ona dezde inisiu serka-sanitária.

Iha parte seluk, Profesora Nércia Guterres Gusmão, husi Departamentu Formasaun Profesór Edukasaun Preskolár, Fakuldade Edukasaun, Arte no Umanidade (FEAH), hateten katak iha inísiu difísil atu aplika aula online ba estudante foun sira, maibé ho esforsu konsege hetan sira-nia kontatu no kria grupu WhatsApp hodi marka orário ho estudante sira.

 “Hafoin kria grupu WhatsApp, ami marka fali aula liuhusi Zoom, inisiu iha loron 30 Marsu. To’o agora ha’u fó aula online de’it tanba fasil entra kontatu ho estudante sira, Google Classroom fasilita atu publika matéria nomós Zoom ajuda atu bele halo esplikasaun, tanba disiplina ne’ebé ha’u lori Matemátika Bázika, presiza atu halo demonstrasaun ruma”, dehan

Dosente ne’e detalle tan katak estudante ne’ebé Departamentu simu, rejistu hamutuk 70, no na’in 63 mak ativu iha aula distánsia.

Média UNTL 📝:   Miguel Gonçalves
Foto 📷:  Miguel Gonçalves

Comment