IMG 0182#TimorLeste #UNTL #VAAGK 22 Marsu 2022
Universidade Nacional Timor Lorosa’e (UNTL) nia Visereitór ba Asuntu Akadémika no Garantia Kualidade (VAAGK), Profesór Doutór Samuel Venâncio de Sousa Freitas hateten, dadus estudante ne’ebé hela iha alojamentu (kos) submete ona ba universidade hamutuk na’in rihun rua atus neen , rua nulu resin lima (2625).

“Dadus ne’ebé fakuldade sira submete ona mai Universidade 2625, no totál ne’e mai husi Departamentu ruanulu (20), husi Fakuldade Enjeñaria, Siénsia no Teknolojia (FECT), Fakuldade Agrikultura (FAGRI), Fakuldade Medisina no Siénsia Saúde (FMCS), Fakuldade Siénsia Ezata (FCE), Fakuldade Edukasaun, Arte no Umanidade (FEAH) no Fakuldade Direitu (FD)”, tenik Vicereitór Profesór Samuel iha Kampus Sentrál UNTL nian, Díli (22-3).

Vicereitór mós rekoñese katak, husi parte universidade no estrutura Fakuldade sira esforsu maka’as hodi bele hetan dadus husi estudante, no kontinua husu nafatin ba estudante sira atu submete ona dokumentu ba Departamentu hodi verifika no submete ba Fakuldade.

Iha fatin hanesan Prezidente Asosiasaun Estudante FMCS nian, João Baptista hateten nia asosiasaun mós apoiu Fakuldade atu hafasil prosesu rekolla dadus husi estudante sira ne’ebé hela iha “kos”.

“Meiu ne’ebé ami uza iha FMCS, mak ajuda estrutura Fakuldade hodi hetan dadus mak ami kontatu direita ba asosiasaun Departamentu nian hodi rekolla dadus kada turma tanba sira mak koñese liu estudante sira ne’ebé hela iha alojamentu hafoin submete ba Fakuldade no horikalan no ohin submete mai Universidade”, hatutan João.

Senadu Baptista mós deskreve katak, bainhira informasaun ofisiál husi Universidade publika mak estrutura Fakuldade hamutuk Asosiasaun buka meiu hodi rekolla dadus estudante sira-nian.

Detalla husi dadus 2625 ne’e, husi FAGRI: 354 (Agropekuária, Agronomia no Peskas e Siénsia Mariña), FEAH: 508 (Ensinu Físika, Ensinu Edukasaun Físika no Desporto, Formasaun Professores Ensinu Básiku no Ensinu Língua Tétum), FCE: 42, FECT: 655 (Engeñaria Mekánika, Engeñaria Sívil, Engeñaria Eletrónika no Elétrika, Engeñaria Informátika no Geologia i Petróleo, inklui mos estudante ne’ebé hela iha Dormitóriu), FMCS: 942 (Eskola Superior de Medisina Jeral, Eskola Superior Enfermagem, Eskola Superior Parteira, Eskola Superior Teknologias Saúde) no Fakuldade Direitu: 124.

Média UNTL 📝 : Agostinho da Cruz e Silva
Foto 📸 : Agostinho da Cruz e Silva

Comment

WhatsApp Image 2021 03 21 at 14.47.221#TimorLeste #UNTL #FEAH #DEF #COVID19 #COVID19TL 21 Marsu 2021
Universidade Nacional Timor Lorosa’e (UNTL), Fakuldade Edukasaun Arte no Umanidade (FEAH) nia Diretór Departamentu Ensinu Fízika (DEF), Profesór Paulo Alves Cabral, no dosente sira ho inisiativa komunitária tulun estudante sira Departamentu nian ne’ebé hela iha “kos” na’in atus ida sanulu resin lima (115).

“Inisiativa ne’e ha’u ho profesór sira DEF nian mak tau hamutuk fós, mina, no ikan-lata sira hodi hakmaan susar ne’ebé ita-nia estudante sira enfrenta, durante implementasaun Serka-Sanitária iha Díli”, hatutan Diretór iha Kampus Liceu UNTL nian, Díli (21-03).

Profesór ne’e mós dezeja katak ho tulun ne’ebé fó bele ajuda estudante sira, maské sei estudante balun mak ladauk hetan maibé profesór sira la promete no sei buka mekanizmu ruma tuir kbiit ne’ebé iha.

“Ami-nia estudante balun mak la hetan, maibé husu ba imi nafatin ho kalma no hakmatek iha idaidak nia fatin tuir protokolu konfinamentu obrigatóriu nian, no ami sei la haluhan buka dalan nafatin se konsege hetan grasa ruma ami sei aviza”, dehan Profesór Paulo.

Apoiu komunitáriu ne’ebé realiza tanba laran luak ne’ebé profesór sira iha, hahú husi diretór no nia dosente sira i konsege tulun duni (fós, mina no ikan-lata) ba universitáriu rezidente “kos” na’in 115 ne’ebé hela iha Díli.

Média UNTL 📝 : Miguel Gonçalves
Foto 📷 : Miguel Gonçalves, Arkivu DEF-FEAH

Comment

IMG 0009TimorLeste #UNTL #VRAAFAG #COVID19 #COVID19TL 18 Marsu 2021
Universidade Nacional Timor Lorosa’e (UNTL) nia Magnífiku Reitór, Profesór dr, João Soares Martins, MPH, Ph.D, hateten katak durante implementasaun Serka-Sanitária (SS) iha Munisipiu Díli, autoriza de’it funsionáriu ne’ebé hala’o atividade esensiál sira bele nafatin servisu hodi atende nesesidade universidade nian.

“Durante implementa serka-sanitária nian ha’u ho pesoál administrativu esensiál sira nafatin ativu hodi responde ba nesesidade universidade nian, funsionáriu hirak ne’e hetan karta autorizasaun husi Reitór atu hala’o atividade ne’ebé ho nesesidade esensiál sira”, tenik Reitór iha knar fatin, Kampus Sentrál UNTL nian, Díli (17/03).

Alende ne’e, Visereitor ba Asuntu Administrasaun Finansa no Administradór-Jerál (VRAAFAG), Profesór Helio Augusto da Costa Xavier Mauquei, PhD, hateten katak, durante serka-sanitária, presiza duni prezensa funsionáriu sira atu funsiona instituisaun no responde ba nesesidade universidade nian ne’ebé ho kategória nesesáriu.

“Durante serka-sanitáriu, funsionáriu ne’ebé hala’o knar iha diresaun esensiál sira tenki mai duni iha edifísiu hodi funsiona servisu administrasaun ne’ebé míninu liuhusi autorizasaun Magnífiku Reitór nian, no nafatin kumpre protokolu Ministériu Saúde nian hanesan uza máskara no mantein distánsia sosiál”.

Profesór Mauquei hatutan, servisu mínimu ne’ebé aplika funsionáriu esensiál sira mak tama servisu troka malu hanesan balun tama dader no balun tama iha parte lokraik atu fó espasu ba malu hodi labele barak liu iha edifísiu ida nia laran.

Média UNTL 📝 : Agostinho da Cruz e Silva
Foto 📷 : Agostinho da Cruz e Silva

Comment

2#TimorLeste #UNTL #FCE #COVID19 #COVID19TL 19 Marsu 2021
Universidade Nacional Timor Lorosa’e (UNTL) nia Magnífiku Reitór, Profesór Dr, João Soares Martins, MPH, Ph.D, iha Gabinete Reitoria UNTL nian Díli (17-3) hateten katak, relasiona ho implementasaun Serka-Sanitária (SS) no Konfinamentu Obrigatóriu, nune’e dosente no estudante sira bele aplika ensinu distánsia tuir idaidak nia posibilidade.
“Normalmente aplikasaun aula online ita halo hela, no uza Zoom, Google Meet, Google Classroom, maibé relasiona ho situasaun atuál, ita enkoraja dosente no estudante sira idaidak hala’o maibé depende ba posibilidade ne’ebé iha”, hatutan Reitór.

Relasiona ho asuntu ne’e, Visereitór Asuntu Akadémiku no Garantia Kualidade UNTL nian, Profesór Doutór Samuel Venâncio de Sousa Freitas, rekoñese mós katak aula distánsia ba dosente no universitáriu sira la’ós abilidade foun maibé idadiak iha ona esperiénsia uza meiu sira.
“Aula distánsia ne’e, sai ona toman ba universidade, mezmu iha konstrajimentu balun tanba situasaun, no ita dezeja katak dosente no estudante sira idaidak iha nia autonomia no posibilidade kona-ba implementasaun aprendizajen online ne’e”, tenik Visereitór.

Relasiona ho asuntu refere, Dekanu Interinu Fakuldade Siénsia Ezata (FCE) nian, Profesór Romualdo Lopes da Cruz, M.Sc, hateten katak, atividade durante SS, dezde 8 marsu liubá, fakuldade mós kansela nia aula prezensiál no aplika ho ensinu-distánsia.

“Meiu ne’ebé ami uza mak Zoom, Google Meet (uza ba aula), Whatsapp (envia traballu sira), Easy Class (Repozitoriu) inklui Facebook Messenger (fahe informasaun), ho meiu hirak ne’e mak uza iha ensinu distánsia ”, hatutan Dekanu Interinu.

Profesós ne’e mós deskreve katak, partisipasaun iha aula estudante sira maioria mak partisipa no maské diferente ho aula prezensiál tanba ho razaun seluk ligadu ho SS.
“Ami-nia ekipa sólidu tebes tanba ne’e, dezeja katak dosente sira disponivel atu fasilita aula no ba alin estudante sira atu uza tempu livre nafatin estuda hanesan tempu normál”, dehan Profesór Romualdo.

Aleinde aula distánsia ba estudante sira, FCE nia dosente sira mós partisipa ona iha formasaun online ba Téknika Espresaun Eskrita Sientífika II iha Portugés ne’ebé fasilita husi Profesora Mariana Rosário husi Centro Língua Portugesa (Projetu FOCO.UNTL).

Média UNTL 📝 : Miguel Gonçalves
Foto 📷 : Arciva FCE

Comment

IMG 9988TimorLeste #UNTL #PDI #COVID19 #COVID19TL 18 Marsu 2021
Universidade Nacional Timor Lorosa’e (UNTL) nia progresu konstrusaun ba edifísiu foun tolu ne’ebé ida lokaliza iha Kampus Sentrál atinje ona (44, 94%), ida iha Fakuldade Ekonomia no Jestaun (54, 88%), enkuantu konstrusaun edifísiu ba Fakuldade Medisina no Siénsia Saúde (FMCS) nian iha Kaikoli atinje ona (91.51%), iha fulan marsu 2021.

“Edifísiu tolu dadaun ne’e prosesu konstrusaun la’o hela hanesan edifisu ba Fakuldade Medisina no Siénsia Saúde nian atinji ona pursentu 91.51, Fakuldade Ekonomia no Jestaun atinji ona pursentu 54,88 no edifísiu iha Kampus Sentrál atinji pursentu 44,94”, hateten Profesór Doutór Lelis Gonzaga Fraga, iha Kampus Sentrál UNTL nian, Díli (18-3).

Proreitór ne’e mós hatutan katak durante ne’e sira nafatin observa konstrusaun sira iha balun atu finaliza ona, hela de’it servisu fíziku balun hanesan pinta, monta janela no seluk tan no balun ne’e esforsu hela atu finaliza tuir tempu.

Iha fatin hanesan, Diretór Kompañia Aitula Unip. Lda, Sr. Silveiro Ferreira Maubere hateten katak nia traballadór sira antes implementa Serka Sanitária iha munisípiu Díli hela ona iha lokál kontrusaun nomós materiál mós sufisiente ba sira hodi halo servisu.

“Durante serka sanitária iha Díli, ami-nia traballadór sira antes ne’e hela iha fatin servisu, no materiál sira antes nia stok ami prepara ona hodi fasilita sira hakmatek iha fatin hodi halo servisu”, tenik Diretór Kompañia Aitula.

Alende ne'e, Supervizór husi Kompañia Linier Unipessoal, Lda, Enjeñeiru Marino Belo Guterres, hateten katak projetu ne’ebé sira responsabiliza ba atinji ona pusentu 91.51 no dadaun ne’e sira esforsu hodi finaliza tuir tempu.

“Konstrusaun ba edifísiu UNTL nian iha Kaikoli ne’e, atinji ona pursentu 91,51 pursentu no ami-nia traballadór dadaun ne’e esforsu atu finaliza tuir nia tempu, no durante serka sanitaria ami nafatin kumpri protokolu husi Ministériu Saúde”, tenik Sr. Marino.

UNTL nia edifísiu tolu ne’e inisia konstrusaun iha 2019, no kompañia ne’ebé responsabiliza ba edifisiu tolu ne’e maka Edifisiu Kampus Sentral no ida iha Fakuldade Ekonomia no Jestaun responsabiliza husi Empreza Aitula Unipessoal, Lda, no ida seluk iha Kampus Kaikoli Responsável husi Linier Unipessoal. Lda.

Média UNTL 📝: Agostinho da Cruz e Silva
Foto 📷: Agostinho da Cruz e Silva

Comment