Universidade Nacional Timor Lorosa’e (UNTL) nia estudante husi Fakuldade Siénsia Ezata (FCE) no Fakuldade Enjeñaria, Siénsia no Teknolojia (FEST), ne’ebé rejistadu atu fila ba idaidak nia munisípiu, simu ona teste swab husi ekipa Sentru Integradu Jestaun Krize (SIJK), iha Resintu Fakuldade Ekonomia no Jestaun (FEG-UNTL) nian, Díli (17/04).
Magnífiku Reitór, Profesór dr. João Soares Martins, MPH, Ph.D, hateten katak universidade nasionál, ba loron dahuluk nian, estudante husi fakuldade rua mak partisipa iha Teste Swab husi Ekipa Médiku SIJK nian, antes fila ba munisípiu.
 
“UNTL iha Fakuldade sia maibé ita hahú ohin (17-4) ho fakuldade Siénsia Ezata (FCE) ho Fakuldade Enjeñaria, Siénsia no Teknolojia (FEST), tanba sira-nia numeru ne’e natoon, no barak liu mak Fakuldade Edukasaun, Arte no Umanidade (FEAH)”, tenik Reitór.
 
Reitór mós hatutan katak bainhira remata swab, estudante sira hetan ona guia husi SIJK mak foin sira bele fila ba sira-nia munisípiu no transporte Governu sei fasilita.
 
Iha fatin hanesan, Koordenadora Pilar tolu (3), dra. Josefina Clarinha João, hateten sira-nia parte sei esforsu atu bele anúnsia hikas rezultadu iha loron tuir mai.
 
“Ami-nia parte sei esforsu atu anúnsia rezultadu, iha loron tuir mai atu bele fasilita ita-nia kolega sira ne’ebé hakarak atu fila sira-nia munisípiu”, tenik Koodenadora.
 
Doutora ne’e mós hatutan baibain sira atende ba swab nian kada loron bele atende totál ema na’in atus haat liu (400+).
 
Tuir dadus ne’ebé mak UNTL rekolla husi estudante sira ne’ebé halo pedidu hakarak fila ba munisipíu hamutuk 3.400, no ba loron dahuluk teste swab komesa ho fakuldade FCE ni FEST no sei remata iha 25-04-2021. Hafoin ekipa sei kontinua swab ba Fakuldade sira seluk:
🗓️ 18-04-2021 ➡️ Faculdade de Direito ➕ Faculdade de Filosofia;
🗓️ 19-04-2021 ➡️ Faculdade de Agricultura;
🗓️ 20-04-2021 ➡️ Faculdade de Economia e Gestão;
🗓️ 21-04-2021 ➡️ Faculdade de Medicina e Ciências da Saúde;
🗓️ 22-04-2021 ➡️ Faculdade de Medicina e Ciências da Saúde;
🗓️ 23-04-2021 ➡️ Faculdade de Educação, Artes e Humanidades;
🗓️ 24-04-2021 ➡️ Faculdade de Educação, Artes e Humanidades;
🗓️ 25-04-2021 ➡️ Faculdade de Ciências Sociais.
 
Média UNTL 📝 : Agostinho da Cruz e Silva
Foto 📷 : Agostinho da Cruz e Silva, Mateus Gonçalves

Comment

Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins MPH, Ph.D, lori naran universidade nian, agradese ba Embaixadór Portugál nian iha Timor-Leste, S.E José Pedro Machado Vieira, ne’ebé ho esforsu umanitáriu apoiu estudante sira mak rezidente iha kos no afetadu husi inuandasaun.
 
“Lori naran universidade nian agradese ba Sr. Embaixadór ho apoiu ne’e, demonstra solidariedade ne’ebé profunda hanesan maun-alin no universidade sei tau hamutuk hodi fó ba estudante, ne’ebé solisita apoiu iha ámbitu Serka-Sanitária no vítima ba inundasaun nian iha Díli”, tenik Profesór Martins.
 
Iha fatin hanesan, Embaixadór Portugál nian iha Timor-Leste dezeja katak ho apoiu ne’ebé fó bele tulun UNTL nia estudante sira ne’ebé presiza apoiu imediatu relasiona ho implementasaun Serka-Sanitária no inundasaun ne’ebé foin akontese iha Díli.
 
“Apoiu ne’e hatudu Portugál nia prezensa iha timoroan sira-nia sorin hanesan maun-alin, sempre ajuda malun, no ha’u hanoin katak ho baze mós ba parseria ne’ebé la’o ona entre UNTL no Embiaxada Portugál iha Díli durante ne’e”, tenik.
 
Diretora-Jerál Jerál Ensinu Superiór no Siénsia, Dra Maria Filomena Lay Guterres, hateten katak lorin naran MESSC nian agradese ba apoiu refere ne’ebé importante tebes ba estudante sira mak presiza hela apoiu.
“Oferta ne’e hatudu ho signifikadu boot tebes, espesialmente ba estudante rezidente iha alojamentu (kos), tanba ne’e ha’u espera katak ba oin kooperasaun ne’e sei di’ak liután no forte, liuliu iha tempu ne’ebé defisil sira”, dehan reprezentante Ministériu Esinu Superiór Siénsia no Kultura (MESSC).
 
Konta ho foos saka 200 ne’e, ekipa UNTL simu mós apoiu husi instituisaun no pesoál balun hamutuk foos saka 79.
 
Ekipa UNTL sei nafatin atende no rejista pesoál no instituisaun ruma ne’ebé hakarak apoiu universidade nasionál nia estudante sira, bele lori ho forma (foos 25Kg), no tuir kbiit ne’ebé iha, mai iha Kampus Sentrál, iha sala-15 (Fakuldade Direitu).
 
Iha biban ne’e kontinua solisita mós ba dosente, funsionáriu inklui instituisaun no individu balun ne’ebé hakarak fó apoiu bele kanaliza mai iha Ekipa, no hafoin sei rekolla hamutuk hodi koordena ho estudante ka rezidente kos sira atu mai simu, hodi sira bele enfrenta Serka-Sanitária no Inundasaun ne’ebé akontese iha Díli 4 Abril liubá.
 
UNTL nia estudante ne’ebé hela iha “kos” no seidauk simu foos rejista ona rihun ida resin (1000+).
 
Partisipa iha eventu refere maka Visereitór, Proreitór, Dekanu, Pesoál Tékniku sira, Ekipa husi Embaixada nian inklui konvidadu sira.
 
Média UNTL 📝 : Miguel Gonçalves, Agostinho da Cruz e Silva
Foto 📷 : Agostinho da Cruz e Silva

Comment

WhatsApp Image 2021 04 15 at 22.46.22#TimorLeste #UNTL #FCS #FEG 15 Abril 2021
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins MPH, Ph.D, akompaña husi Proreitór hodi observa direita diresaun sira ne’ebé afeta husi inundasaun ne’ebé akontese iha 4 Abril liubá.
 
“Objetivu husi observasaun ne’ebé hala’o iha Kampus Sentrál UNTL nian, Díli (12/04) ne’e, hodi haree direta kona-ba fasilidade sira ne’ebé hetan estragu hosi inundasaun, hodi bele buka solusaun lalais, nune’e, bele kontinua atende nesesidade universidade nian” tenik Reitór.
 
Iha sorin seluk, Proreitór ba Asuntu Inspesaun, Auditoria no Kontrolu Kualidade, Profesór José Honorio da C. P. Jerónimo, hateten katak durante inundasaun ne’ebé akontese iha semana kotuk afeta mós ba UNTL, liuliu nia Diresaun balun no Fakuldade sira.
 
“Inundasaun ne’ebé akontese iha Díli, afeta ba universidade nia Fakuldade 2 nomós Diresaun balun, no konsege estraga sasan sira hanesan komputadór, meza, kadeira no dokumentu balun”, tenik Proreitór José Honorio.
 
Profesór José Honorio mós hatutan ekipamentu presiza responde urjentu mak komputadór sira husi Departamentu Tezouro nian, nune’e mós Diresaun Aprovizionamentu, Diresaun Nasionál Rekursu Umanu, Diresaun Nasionál Lojístika no Manutensaun.
 
“Aleinde diresaun sira, nune’e mós ekipamentu sira husi administrasaun no Biblioteka husi Fakuldade Siénsia Sosiais (FCS) no Fakuldade Ekonomia no Jestaun (FEG) nian, mós hetan estragu”, hatutan.
 
Média UNTL 📝 : Altur Ramos (estajiáriu)
Foto 📷 : Mateus Gonçalves, Arkiva husi DNJB, DNLM no DNAP

Comment

Universidade Nacional Timor Lorosa’e (UNTL), liuhusi Fakuldade Edukasaun, Arte no Umanidade (FEAH) nia Visedekanu Asuntu Estudantíl, Profesór Sabil José Branco, servisu hamutuk ho Departamentu Ensinu Língua Portugés (DELP) koordena ho Plan International ba Timor-Leste (PI-TL) distiribui ai-han no sasan bazika ba estudante na’in limanulu (50).
 
Iha Kampus Liceu UNTL nian, Díli, (15/4) Profesór Sabil José Branco hateten katak apoiu refere hetan liuhusi koordenasaun entre profesor sira husi DELP-FEAH nian ho Plan International ho nia fundu husi Uniaun Europeia hodi ajuda ba estudante afeitadu sira husi inundasaun no Serka Sanitária.
 
“Inisiativa ne’e mai husi Profesór sira mak buka dalan hodi hetan apoiu, kuandu sira hetan ona laos deit ba estudante Ensinu Língua Portugés de’it maibé fó mós estudante sira seluk inklui estudante na’in ida husi Fakuldade Ekonomia no Jestaun (FEG)”, hateten Profesór Sabil.
 
Apoiu ne’e entrega direta husi Embaixadór Uniaun Europeia nian iha Timor-Leste, Sr. Andrew Jacobs, no Country Director Plan International Timor-Leste, Sra. Dillyana Ximenes.
 
Kada estudante simu pakote ida kompostu husi Disposal Maskra, Sabun, Hand Sanitazer, Sabun Lifeboy, Pastedenti, Eskova nehan, shampoo, Dancow milk, Supermi, Masin, Mina, ikan-lata, Masin-midar, Manu-tolun, Biti, kanuru, bikan, kopu-masa, manta no foos 25 kg.
 
Média UNTL 📝 : Mateus Goncalves
Foto 📷 : Mateus Goncalves, Arkivu FEAH

Comment

Samuel#TimorLeste #UNTL #VRAAGK 15 Abril 2021
Universidade Nacional Timor Lorosa’e (UNTL) nia Visereitór ba Asuntu Akadémiku no Kontrolu Kualidade (VRAAGK), Profesór Doutór Samuel Venâncio de Sousa Freitas, hateten katak universidade nasionál rejista ona estudante hamutuk rihun tolu atus haat (3.400) mak desidi hakarak fila ba munisípiu orijin.
 
“Dadus rekolla ona estudante sira ne’ebé atu fila munisípiu hamutuk 3.400 husi fakuldade sia ne’ebé eziste iha UNTL, barak liu mai husi Fakuldade Edukasaun Arte no Umanidade (FEAH) no Fakuldade Medisina no Siénsia Saúde (FMCS), sira deside fila ba idaidak nia munisípiu tanba nesesidade no razaun seluk” tenik Visereitór, iha Kampus Sentrál UNTL nian, Díli (11/4).
 
Visereitór mós hatutan katak universidade submete tiha ona lista hirak ne’e ba Ministériu Ensinu Superiór, Siénsia no Kultura, hodi organiza teste swab ba estudante sira antes fila ba munisípiu. Iha tempu besik tuir mai, UNTL sei fo sai orariu ba teste swab.
 
Universidade nia estudante hirak rejistadu ba munisípiu tanba iha difikuldade atu sustenta sira durante hela iha Dili, durante implementasaun Serka-Sanitária.
 
Dezde loron 8 abril liubá dadus estudante sira-nian rejista indika katak maioria husi Fakuldade Edukasaun, Arte no Umanidade no Fakuldade Medisina no Siénsia Saúde.
 
Média UNTL 📝 : Agostinho da Cruz e Silva
Foto 📷 : Altur Ramos (estajiáriu)

Comment