Screen Shot 2021 04 22 at 16.11.18#TimorLeste #UNTL #KIPKI 22 Abril 2021

Universidade Nacional Timor Lorosa’e (UNTL), liuhusi Komisaun Implementasaun Planu Kontijénsia Interna (KIPKI)-UNTL, ne’ebé lidera husi dra. Teresa A. Madeira Soares, BDS, MPH, atuál Diretora Poliklínika Universitária, servisu hamutuk ho Sentru Integradu Jestaun Krize (SIJK), halo ona teste swab ba estudante hamutuk na’in 787.

“Ita hahú teste swab ne’e ba estudante sira ne’ebé hakarak atu fila ba sira-nia munisípiu tanba ne’e molok atu ba foho presiza iha guia-marsa, antes atu hetan sira tenki halo teste swab no rezultadu negativu mak bele autoriza sira fila ba sira knua”, tenik Doutora Teresa iha Varanda Oin FEG nian (22/4).

Doutora ne’e mós hatutan katak, durante loron haat (4) ekipa halo teste swab ba estudante hamutuk na’in 787 no husi sira ne’e na’in 46 mak pozitivu.

 

IMG 6831

“Dezde 17 to’o 20 Abril ne’e ita iha dadus hamutuk 787 estudante mak mai halo swab, husi sira ne’e na’in 46 mak rezultadu pozitivu restu negativu, no hirak ne’ebé pozitivu parte SIJK direitamente ba foti ona, maibé bainhira iha difikuldade ami fasilita sira mós hodi evakua estudante sira ne’e ba sala izolamentu”, hatutan Doutora Teresa.

IMG 6778

Koordenadora KIPKI ne’e mós akresenta liután katak, ba hirak ne’ebé rezultadu negativu, hahu aban, loron 23 fulan Abril, oras servisu nian, bele ba direita SIJK iha Centru Convenções Díli, hodi foti rezultadu atestadu médiku nian, nune’e mós hetan guia-marcha karik balun atu ba ho transporte privadu.

Ba sira ne’ebé presiza apoiu transporte, UNTL sei servisu hamutuk ho Ministériu Ensinu Superiór, Siénsia no Kultura, hodi oferese solusaun ba sira nia pedidu.

Média UNTL 📝:   Agostinho da Cruz e Silva
Foto 📷:   Agostinho da Cruz e Silva

Comment

WhatsApp Image 2021 04 22 at 10.42.08

#TimorLeste #UNTL #VRAAGK #VRE 22 Abril 2021
Universidade Nacional Timor Lorosa’e (UNTL) nia Visereitór ba Asuntu Akadémika no Garantia Kualidade (VRAAGK), Profesór Samuel Venâncio de Sousa Freitas, iha nia knar fatin Kampus Sentral, UNTL nian, Díli (21/04) hateten katak, universidade nasionál hamosu graduasaun virtuál (GV) tanba situasaun Estadu Emerjensia no mós Serka-Sanitária (SS) iha Munisípiu Díli.

“Graduasaun online ne’e mosu tanba ita iha situasaun Serka-Santiária, no bandu atu halibur ema barak relasiona ho tranzmisaun COVID-19 iha Timor-Leste, tanba ne’e mak ita hamosu graduasaun ne’e atu atende ba estudante hirak ne’ebé presiza hetan diploma atu aplika ba vaga servisu ruma”, tenik Visereitór.

VRAAGK ne’e mós husu ba fakuldade liuliu departamentu sira atu rekolla hela dadus husi graduandu hirak ne’ebé hakarak partisipa iha graduasaun online, hafoin envia lista ba universidade.

 WhatsApp Image 2021 04 22 at 10.42.09

Iha fatin hanesan, Visereitora ba Asuntu Estudantíl, Profesora Eng. Lígia Correia, M.Sc hateten,  graduasaun virtuál ne’e la’os obrigatóriu atu hotu-hotu partisipa maibé ba sira ne’ebé mak iha inisiativa atu partisipa tanba presiza ona atu hetan sira-nia diploma.


“Iha programa graduasaun nakloke ba fakuldade hotu ne’ebé eskolla hakarak partisipa iha graduasaun virtuál ka prezensiál la obriga maibé depende ba sira ne’ebé iha inisiativa atu partisipa, no rejista”, hatutan Visereitora.

Visereitora ba Asuntu Estudantil ne’e mós hatutan katak dadaun ne’e husi Fakuldade Medisina Siénsia Saúde (FMCS) hamutuk estudante sira na’in 36 hakerek sira-nia naran ho asinatura hatama ona ba universidade, sira hakarak atu gradua liuhusi virtuál tanba presiza hetan ona sira-nia diploma.

Média UNTL 📝:   Agostinho da Cruz e Silva
Foto 📷 :   Agostinho da Cruz e Silva

Comment

 IMG 6422
#TimorLeste #UNTL #FEAH 20 Abril 2021

Universidade Nacional Timor Lorosa’e (UNTL), Fakuldade Edukasaun Arte no Umanidade (FEAH) nia Sívitas Akadémika (Estudante, Dosente no Funsionáriu) Departamentu Ensinu Kímika (DEK) simu vizita ikus husi matebian Profesór Doutór Cristovão Ramiro Belo, iha knua Liceu UNTL nian, Díli (20/04).

IMG 6430

Iha vizita ne’e estrutura FEAH, ho estudante no alumni Departamentu Ensinu Kímika nian simu matebian ho matanbeen, tanba momentu ne’e mak ikus atu sira hasoru nia, ho kondisaun ne’ebé lahanesan hodi hato’o ho sentimentu, adeus no presta omenajen ikus ba matebian ne’ebé dedika ona ba UNTL durante sei moris.

IMG 6462

Hafoin despedida ne’ebé hala’o, Matebian nia isin mate sei lori bá iha nia knua moris, munisípiu Viqueque, Postu-Administrativu Ossú, Suco Builale aldeia Uete Cai Ana.

Média UNTL 📝 : Agostinho da Cruz e Silva
Foto 📷 : Agostinho da Cruz e Silva

Comment

IMG 6715

#TimorLeste #UNTL #USEmbassyinTimorLeste  21 Abril 2021
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MPH, Ph.D, akompaña husi Proreitora ba Asuntu Kooperasaun, Profesora Doutora Lídia Gomes, SKM, M.D. simu vizita husi S.E. Embaixadór foun Estadus Unidus Amérika (EUA), S.E. Charles Kevin Blackstone, ho nia ekipa, iha sala Vídeokonferénsia UNTL nian, Díli (21/04).

IMG 6680 
Vizita ne’e hala’o ho objetivu, hodi atualiza kooperasaun ne’ebé implementa ona husi Governu Amérika nia Embaixadór iha Timor-Leste, ho nia sentru sira ne’ebé eziste iha UNTL, hanesan Uma Amérika (American Corner) no Sentru Dalen Inglés ne’ebé durante ne’e fasilita mós informasaun kona-ba bolsu estudu ne’ebé oferese husi Governu Amérika ba timoroan sira ne’ebé hakarak ba estuda iha Amérika.


Média UNTL 📝:   Mateus Gonçalves
Foto 📷:   Mateus Gonçalves

Comment

Profesor CristovaoTimorLeste #UNTL #FEAH #GabCEDU 19 Abril
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, hamutuk ho Sívitas Akadémika universidade nian, hato’o sentidu kondolénsia ba matebian Profesór Doutór Cristovão Ramiro Belo, iha nia residénsia Osindo, Díli, (19/04).
 
Hafoin presta tiha omenajen ba matebian, Reitór hateten estrutura ho sívitas tomak hamutuk ho família matebian lakon ema di’ak ida, ne’ebé durante ne’e dedika nia-an ba Universidade Nasionál.
 
“Ita hotu triste, tanba família hamutuk ho univesidade lakon ema di’ak ida ne’ebé dedika-an iha ho tempu kleur nomós hola parte hodi funda Departamentu Ensinu Kimíka to’o oras ne’e konsege prodús ona rekursu umanu barak hodi kontribui ba Timor-Leste”, tenik Reitór.
 
Reitór mós demonstra ho senti triste, tanba loloos ida ne’e la espera atu akontese maibé buat hotu Maromak nia planu, no ho orasaun hamutuk ho família dezeja katak matebian Profesór Cristovão bele hakmatek ho pás.
 
Reitor iha Cristovao uma 
Iha omenajem ne’e, Reitór hetan akompaña husi Visereitór, Proreitór, Diretór-Jerál no Diretór Nasional, Dekanu, Vise-dekanu, Dosente no Estudante sira.
 
Biodata Matebian nian:
Cristovão Ramiro Belo, moris iha Munisípiu Viqueque, Postu-Administrativu Ossú, Suco Builale, aldeia Uete Cai Ana, iha loron 10 marsu 1964. Oan husi Elizio de Sousa no Petrolina do Rego Pereira, no oan ba datoluk husi maun alin ida no feton ida.
 
Edukasaun Formál:
Eskola Bázika Katólika Lai-Soro-Lai, iha tempu koloniál Portugés, hanesan 3a no 4a Classe. Husi tinan 1982, eskola Bázika Katólika do Reino de Venilale, iha tempu okupasaun Indonésia, eskola pre-sekundária iha Eskola Salesianu Don Bosco Fatumaca (1985), no kontinua eskola sekundária iha fatin henesan iha tinan 1988.
 
Iha tinan 1993, hasai kursu Baxarelatu iha área Edukasaun, Departamentu Kímika, Fakuldade Matemátika no Siénsia Ezata iha Universdiade Públika Nusa Cendana, Kupang-Indonesia. Kontinua nia Mestradu iha Fakuldade Farmasia husi Universidade do Porto (Portugal, 2010).
 
Edukasaun formál matebian nian konklui ho Doutoramentu iha área Kímika Superfisiál no Material husi Eskola Siénsia no Teknolojia iha Departamentu Kímika, Universidade Évora no remata iha Tinan 2019.
 
Kareira
Dosente iha UNTL-FEAH, Departamentu Ensinu Kímika komesa iha tinan 2000 to’o remata nia jornada iha mundu, aleinde ne’e, iha tinan 2010 hala’o mós knar hanesan dosente iha Programa Pós Graduasaun no Peskiza (PPGP-UNTL) iha area Edukasaun Ambiental, Kursu ne’e halo kooperasaun ho Capes (Brazil) ho Timor-Leste iha Fakuldade Edukasaun,Arte no Umanidade.
 
Esperiénsia no Kontribuisaun
Fundadór ba Departmentu Kímika iha tinan 2001 momentu hanesan asumi mós kargu Diretór Departamentu (2001-2005). hanesan Visedekanu I, iha Fakuldade Edukasaun, Arte no Umanidade (2005-2007).
 
Hafoin iha tinan 2011 to’o 2012 asumi hikas kargu hanesan Diretór Departamentu, iha tinan 2012 to’o 2013 hala’o knar hanesan Asesór inklui Komisaun Independente ba Ensinu Superiór iha Ministériu Edukasaun.
 
Antes matebian hakotu nia viajen iha mundu ne’e, asumi kargu hanesan Diretór-Jerál Gabinete Sertifikasaun Dosente (GabCEDU) iha Universidade Nacional Timor Lorosa’e iha tinan 2021.
 
Média UNTL 📝 : Agostinho da Cruz e Silva
Foto 📷: Agostinho da Cruz e Silva

Comment