#TimorLeste #UNTL #VRAE #COVID19 #COVID19TL 10 Marsu 2022
Universidade Nacional Timor Lorosa’e (UNTL) liuhusi Gabineti Visereitoria ba Asuntu Estudantís selebra loron Mundiál Feto nian no selebra ezisténsia Asosiação das Mulheres Académica (AMA) ba tinan ida iha UNTL ho tema “Igualdade de Género Hoje Para Amanha Sustentável”, iha Auditóriu Fundação Oriente, Díli (08/03).
Magnífiku Reitór Profesór dr. João Soares Martins MPH, Ph.D, lori naran universidade nian hodi fó parabéns ba Feto Timor-Leste ne’ebé kontribui ona iha prosesu libertasaun Timor-Leste durante okupasaun no partisipasaun feto nian Dezenvolvimentu Nasional.
“Ita tenki fó parabéns ba feto Timor-Leste ne’ebé mak kontribui ona ba luta Libertasaun Nasionál hanesan, mana Rosa Muki Bonaparte no sira seluk ne’ebé mak kontribui ona ba Timor-Leste nia prosesu luta ba libertasaun”, tenik Reitór. 
Magnífiku Reitór hatutan, tinan ida ne’e Timor espesial tebes tanba iha feto na’in ha’at mak kandidata an ba Eleisaun Presidensiál 2022 nian, hodi kompete ho mane na’in 12 tan ne’e tenki orgullu tanba feto sira mós lalakon iha kampu polítika.
Iha fatin hanesan, Visereitora ba Asuntu Estudantís Eng. Ligia Tomás Correia, M.Sc hateten loron 8 fulan marsu importante ba feto sira mundu inklui Timor-Leste tanba Nasoens Unidas rekoñese feto sira-nia kontribuisaun no sofrimentu sira.
“iha dia 8 de marsu loron importante ba feto mundiál tanba Nasoens Unidas rekoñese no valoriza feto nia ezisténsia husi sira-nia sofrimentu no kontribuisaun, nune’e mós selebra tinan ida ba ezisténsia Asociação Mulheres Académica (AMA) ne’ebé eziste iha Universidade”, tenik Visereitora.
Profesora Ligia mós hatutan, liuhusi selebrasaun ida ne’ebé universidade hala’o hodi fo valorizasaun ba loron feto mundiál nian nune’e mós feto akadémika no feto Timor-Leste.
Partisipa iha selebrasaun ne’e, Proreitora ba Asuntu Kooperasaun Profesora Dra. Lidia Gomes, Dosente no estudante sira no konvidadu sira.
Média UNTL 📝 : Agostinho da Cruz e Silva
Foto 📷 : Altur Ramos, Laurindo da Cruz Gomes