#TimorLeste #UNTL #DEMKOM #COVID19 #COVID19TL 14 Outubru 2021 - Universidade Nacional Timor Lorosa’e (UNTL), liuhusi Diresaun-Jerál Servisu Apoiu Reitoria nia Departamentu Média no Komunikasaun (DEMKOM) hala’o enserramentu ba atividade estájiu profisionál ba estudante Departamentu Komunikasaun Sosiál, Fakuldade Siénsia Sosiál (DCS-FCS) na’in haat ne’ebé kompleta ona sira-nia estájiu.
Iha atividade ne’ebé realiza iha sala Vídeo Konferénsia ne'e (13/10), Vise-Reitora ba Asuntu Estudantís, Profesora Eng. Lígia Tomás Correia, M.Sc, hateten, universidade fó nafatin korajen ba estudante sira atu aprende, maibé atu aproveitamente ne’e husi idaidak nia esforsu no vontade.
“Atu eleva ita-nia kapasidade pesoál ne’e, ida-idak mak tenki esforsa aan, tanba universidade fó meiu hotu no fasilidade, imi-nain haat bele mai hamutuk ho Ekipa DEMKOM, no ha’u mós bele koñese imi hodi bele fahe informasaun ne’e ba malu di’ak liután,” tenik Visereitora.
Iha fatin hanesan, Xefe Departementu DEMKOM nian, Sra. Adelaide Maria Filipa da Cunha, agradese ba parte Fakuldade nia DCS no Gabinete Reitoria, ne'ebé fó fiar ba DEMKOM atu sai fatin estájiu ba estudante sira.
“Durante ne’e ami tetu katak Departamentu ne’e harii duni ho rekursu no fasilidade ne’ebé natoon, maibé Departementu Komunikasaun Sosiál fó fiar ba Departamentu ne’e atu sai fatin estájiu ba alin estudante sira”, tenik Xefe DEMKOM.
Xefe Departamentu mós dezeja katak, estudante sira bele aprende koñesimentu ruma liuliu iha prátika, tanba sira mak iha área espesializada liga ba prosesu produsaun notísia, jestaun tempu, no administrasaun.
Iha fatin hanesan, Orientadór Profesór Miguel Gonçalves, L.CS. agradese ba DEMKOM, ne’ebé fó ona fatin ba estudante sira atu bele hala’o sira nia estájiu profisioál no kontinua solisita ba DEMKOM-UNTL atu bele fó nafatin oportunidade hanesan ba estudante sira iha futuru.
“Hanesan orientadór, ha’u deseja esperiénsia ne’ebé sira hetan husi DEMKOM bele fasilita ona sira komprende kona-ba realidade husi teoria ne’ebé sira aprende no preparadu ba idaidak nia futuru, no aleinde ne’e sira mós koñese estrutura sira universidade nian”, hatutan orientadór.
Iha fatin hanesan, estajiária Leonia de Araújo representa sira seluk, fo agradese ba DCS no DEMKOM no ekipa tomak ne’ebé durante ne’e akompaña sira iha prosesu aprende nian, no expresa sira esperiénsia ne’ebé sira hetan durante iha períodu estájiu.
“Hakerek notisia dalaruma sente difísil, maibé liuhusi servisu ekipa aprende iha Departamentu ne’e, ami bele aplika no hetan koñesimentu prátiku”, tenik Leonia.
Iha enserramentu ne’e, DEMKOM mós oferese sertifikadu apresiasaun ba estajiáriu sira, ne’ebé apoiu ona universidade.
Partisipa iha serimónia ne’e, Diretór-Jerál Servisu Apoiu Reitoria, Sr. Jacinto H. S. Belo, M.EGA, ho ninia ekipa, Asesór Tekniku Reitoria, Sr. Diogo Freitas da Silva no Sr. Mateus Gonçalves, Xefe Departamentu Protokolu, Sra. Amonia Lobato, funsionáriu no estajiáriu sira.
Média UNTL : Laurindo da Cruz Gomes
Foto : Pio Belo Ximenes