#TimorLeste #UNTL #FD #COVID19 #COVIDTL 13 Outubru 2021 - Universidade Nacional Timor Lorosa’e (UNTL), nia Fakuldade Direitu hala’o semináriu ho tema "Promover e Elevar os Conhecimento Jurídicos dos Estudantes da Faculdade de Direito através da Realizacão da Atividade de Palestra” hodi komemora Loron Ezistensia Fakuldade Direitu ba dala sanulu resin neen (XVI).
Iha Auditóriu Liceu UNTL nian, (13/10), Dekanu FD nian, Profesór Isidoro Viana da Costa, hateten, nia parte realiza semináriu ne'e atu fó koñesimentu ba estudante sira hodi domina saida mak papél husi jurísta nian ba direitu hodi kombate korupsaun, nune’e bele foti desizaun ba kondenasaun hahalok kriminál sira iha Timor-Leste.
“Fakuldade Direitu nia papél atu forma, eduka no kontribui ba Estadu Demokrátiku iha Timor-Leste, tanba ne’e ami konvida Komisaun Anti Korupsaun hodi fahé koñesimentu sira kona-ba papél jurísta nian, importante hodi kontribui ba estabilidade sosiedade nian liuliu iha krime organizadu sira hanesan, hahalok korupsaun hodi fó benefisiu ba pesoál iha nia vida” dehan Dekanu.
Iha fatin hanesan, Komisáriu Komisaun Anti Korupsaun(KAK), Dr. Sérgio Hornai, hateten jurista tenke sai sabedoria ba razaun no koñesimentu no iha ligasaun ho direitu no demokrásia atu defende sidadaun iha Tribunál.
“Ita bo’ot sira iha espetativa bo’ot bele sai lisensiadu iha direitu ho exelente, atu nune’e bele manan konvivénsia iha grande komunidade”, tenik Komisáriu.
Iha fatin hanesan, presidente komisaun organizadora, Joaquim Domingos Ramos, hateten, objetivu husi semináriu refere atu ajuda kontribui no eleva kapasidade jurídika estudante sira-nian.
“Ha’u rona esplikasaun husi oradór Dr. Sergio Hornai katak, oinsá papel jurísta nian iha estadu direitu demokrátiku atu hatur loloos justisa tuir nia fatin, nomós oinsa atu hamutuk ho orgaun estatal sira iha estadu ne’e nian, atu haree ba iha problema sosiál defisiensia hodi fó solusaun ba iha sosiedade sira”, tenik Joaquim.
Partisipa iha semináriu ne’e, estrutura Fakuldade Direitu, Komisáriu Komisaun Anti Korupsaun (KAK), Dr. Sérgio Hornai, dosente, no estudante inklui konvidadu sira.
Média UNTL : Denilson A. Barros
Foto : Denilson A. Barros