#TimorLeste #UNTL #COVID19 #COVID19TL 13 Outubru 2021 - Universidade Nacional Timor Lorosa’e (UNTL), nia Magnífiku Reitór Profesór Doutór João Soares Martins, MPH, PhD, hala’o abertura ba aktividade VI Jornada Pedagójika ho nia tema “Dezafiu iha Ensinu no Investigasaun ba Dalen Portugés iha Ázia” entre 13-15 Outubru 2021.
Iha Kampus Sentrál UNTL nian (13/10), Magnífiku Reitór UNTL nian hateten, Jornada Pedagójika ne’e importante tebes ba akadémiku sira, liuliu ensinu dalen portugés atu bele troka ideia relasiona ho situasaun jerál iha mundu no kontekstu Ázia nian.
“Jornada Pedagójika ne’e importante tebes ba dosente, akadémiku no peskizadór sira, tanba ita presiza troka ideia ho nasaun seluk, relasiona ho situasaun jerál nian liuliu iha Ázia, maibé ita-nia esforsu tenke hatene dalen portugés”, tenik Reitór.
Eventu refere realiza tanba servisu hamutuk entre Centro de Língua Portuguesa UNTL, Camões, IP, ho Embaixada de Portugal iha Díli.
Partisipa iha abertura ne’e, Visereitór, Proreitór, Diretór Jerál, Diretór Nasionál, Funsionáriu, Dekanu, Visedekanu, Dosente, Estudante, Diretór Ezekutivu ANAAA, Profesór Edmundo Viegas, Ph.D, Embaixadór Portugal iha Timor-Leste, Sr. José Pedro Maichado Vieira, inklui konvidadu sira.
Média UNTL : Leonia de A. da Costa
Foto : Pio Belo Ximenes