#TimorLeste #UNTL #FCS #COVID19 #COVID19TL 11 Outubru 2021 - Universidade Nacional Timor Lorosa’e (UNTL), liuhusi Fakuldade Siénsia Sosiál (FCS), realiza formasaun Estájiu Servisu Sosiál (ESS) períodu 2021 nian, ba estudante finalista na’in atus haat limanulu resin rua (452), antes dezloka ba hamutuk ho komunidade iha munisípiu Baucau,Viqueque, no Lauten.
Dekanu FCS nian, Prófesor Camilo Ximenes Almeida, iha Kampus Kaikoli UNTL nian, Dili (11/10), hateten katak ESS implementa bazeia ba pilár tolu universidade nian katak (1) ensinu, (2) investigasaun no (3) dedikasaun ba sosiedade.
"Estájiu ne’e hanesan rekezitu importante ba estudante sira antes apresenta sira-nia proposta no monografia, tanba ne’e sira tenke tuir estájiu atu aplika koñesimentu ba komunidade no aprende husi komunidade, nune’e bele preparadu ba futuru bainhira sira remata estudu” tenik Dekanu FCS.
Dekanu hatutan tan katak, estudante sira sei ba lokál durante fulan rua, hahú husi 14 fulan Outubru to’o 17 fulan Dezembru tinan 2021, nune’e mós estudante sira ne’ebé atu ba estájiu tenke iha kartaun vasina dala rua tanba relasaun ho situasaun pandemia COVID-19.
Iha fatin hanesan, estudante Administrasaun Públika, Luis Maria Agosto, hateten formasaun refere esplika liu kona-ba oinsá estudante sira bele hala’o ESS iha terenu hamutuk ho sosiedade, liuliu atu hatene oinsá halo adaptasaun ho komunidade iha fatin estájiu.
“Antes ami ba estájiu, ami sei hetan formasaun husi Fakuldade iha relasaun ho oinsá ami ba halao estájiu servisu sosiál hamutuk ho komunidade iha Munisípiu” Tenik Luis.
Luis hatutan, nu’udar estudante estajiáriu, dezeja katak sei aplika no aprende husi komunidade nune’e bele buka solusaun hamutuk ba problema ne’ebé komunidade hasoru bazeia ba kbiit ne’ebé iha.
Bazeia ba totál 452 ne’e, kompostu husi Departamentu Komunikasaun Sosiál (120), Administrasaun Públika (92), Siénsia Polítika (22), Dezenvolvimentu Komunitáriu (94), Polítika Públika (52), Relasaun Internasionál (40) no Inkluzaun Komunitária Sosiál (32).
Média UNTL 📝: Denilson A. Barros
Foto 📷: Leonia de A. Da Costa