#TimorLeste #UNTL #PR-PM # FECT 06 Outubru 2021 - Universidade Nacional Timor Lorosa’e (UNTL) nia Ekipa Elaborasaun Planu Estratéjiku (EEPE- 2021–2030), lidera husi Proreitór ba Asuntu Planeamentu, Monitorizasaun no Avaliasaun (PR-PMA), Profesór Nelson Salsinha, Ph.D, aprezenta rezultadu servisu EEPE nian, hodi hetan apresiasaun no sujestaun husi estrutura UNTL nian.
Iha Auditóriu Fakuldade Enjeñaria, Siénsia no Teknolojia (FECT), Hera (16/07), Magnífiku Reitór, Profesór dr. João Soares Martins MPH, Ph.D, hateten ekipa partilla konteúdu planu estratéjiku 2021-2030 hodi hetan input ruma.
“Sira mai partilla ho ita kona-ba konteúdu Planu Estratéjiku 2021-2030, ne’ebé planeia atu lansa iha novembu agora, tanba ne’e ita presiza halo konsultasaun klean ida, hodi hetan ideia balun husi profesór no Unidade sira hotu iha UNTL bele fó hanoin”, tenik Reitór.
Iha fatin hanesan, Proreitór PR-PMA, hateten katak ekipa ne’e inisia servisu iha fulan abril to’o outobru ne’e konsege hakat liu ona pasu balun.
“Ekipa ida ne’e ami servisu dezde iha fulan abril to’o mai momentu ida ne’e, ne’ebé pasu lubuk bo’ot ida ne’ebé ita liu ona, ohin mai aprezenta hikas hodi husu nafatin ita bo’ot sira-nia kontribuisaun atu ita bele rezolve planu estratéjiku ida ne’ebé repezenta duni ita hotu nia hakarak”, tenik Profesór Nelson.
Profesór Nelson mós hatutan prosesu halo ona konsultasaun ho parte hotu iha universidade nian hahú husi Estudante, Profesór, Unidade, Fakuldade hotu inklui Reitoria.
Partisipa iha Sorumutu ne’e Visereitór, Proreitór, Dekanu, Vise-Dekanu, Diretór Akadémiku Diretór-Jerál, Diretór Nasionál, Xefe Departamentu, no konvidadu sira.
Média UNTL 📝 : Agostinho da Cruz e Silva
Foto 📷: Pio Belo Ximenes