#TimorLeste #UNTL #FCS #DIKS #COVID19 #COVID19TL 22 Jullu 2021
Universidade Nacional Timor Lorosa’e (UNTL) nia Dekanu Fakuldade Siénsia Sosiál (FCS), Profesór Camilo Ximenes Almeida, iha Kampus Kaikoli UNTL nian Díli (13/07) hateten, Departamentu Inkluzaun Komunitária Sosiál (DIKS) sei fó edukasaun espesiál ba sidadaun dizabilidade sira iha nível superiór.
“Iha DIKS ida ne’e, primeiru misaun atu fó oportunidade ba ema sira ho kondisaun dizabilidade, nune’e mós ba família dizabilidade, maibé iha tinan oin (2022) sei loke espasu ba ema hotu atu bele mai rejista iha departamentu ne’e” dehan dekanu FCS.
Iha fatin hanesan, Diretór DIKS, Profesór Januario Correia hateten katak, hahú iha 2018 departamentu ne’e sai hanesan área espesializasaun ida iha Departamentu Dezenvolvimentu Komunitária (DC), no bazeia ba despaxu Magnífiku Reitór, formalmente iha 1 Abril 2021, DIKS hanesan departamentu ida iha FCS.
“Bainhira iha 9 marsu 2021 ne’e, ita abertura aula ba tinan ida ne’e, entaun ami orienta estudante foun sira oinsa prienxe Fixa Planifikasaun Estudante (KRS) liuhusi online de’it, aleinde ne’e ami mós hahú aula online ba estudante sira iha ámbitu serka-sanitária”, dehan Diretór DIKS.
Profesór Correia salienta liután katak, durante serka-sanitária atividade aula online la’o hela, estudante sira partisipa hotu ho di’ak, no ba sira ne'ebé la partisipa sei buka meiu hodi rekupera.
DIKS ne’ebé antes ne’e integra iha DC, gradua ona graduadu hamutuk 81 ho nível baxarelatu (Diploma I) no ba Diploma III nia sei iha fase hakerek monografia, totál estudante 150.
Média UNTL : Altur Ramos (estajiáriu)
Foto : Altur Ramos(estajiáriu), Arquivu DIKS