UNTL-FECT NIA ESTUDANTE KONSTROI HELA FATIN PROVIZÓRIU BA VÍTIMA INUNDASAUN

UniversiDade Nacional Timor Lorosa’e (UNTL), liuhusi Fakuldade Enjeñaria, Siénsia no Teknolojia (FECT) nia estudante ne’ebé dadaun ne’e hela iha Dormitóriu Hera, halo asaun karidade liuhusi konstroi uma ba refujiadu hirak ne’ebé hamahan-an iha rezidensia Kongregasaun Kanosianu Hera, tanba afeita husi inundasaun ne’ebé akontese iha loron 4 Abril liubá.

 

Amu Kapelaun UNTL nian, Pe. Nívio Correia Lebre Fdcc, iha nia entrevista hateten katak, estudante sira ne’e kompostu husi Departamentu 5 ne’ebé eziste iha FECT mak halo asaun refere hodi apoiu vítima inundasaun nian, nomós espresa solidaridade universidade nian.

 

“Estudante FECT kompostu husi Departamentu 5, sira hakarak ho voluntariamente halo asaun karitativa ida, liuhusi koordenasaun ho Gabineti Proreitór ba Asuntu Provedoria no Akonsellamentu (PRAPA), husi asaun ida ne’e espresa mós solidaridade universidade nian ba vítima inundasaun ne’ebé lakon sira-nia hela fatin” tenik Amu Kapelaun.

Padre Nívio mós hatutan, uma ne’ebé konstroi ba vítima sira atu hela provizóriu, tanba barak mak ho labarik ki’ikoan no balun bebé foin moris.

Iha fatin hanesan, responsável ba konstrusaun Ajino Baptista hateten, nu’udar estudante hakarak halo asaun ruma ba vítima sira ne’ebé presiza tulun no aleinde konstrusaun, sira mós apoiu nesesidade balun ba vítima sira.

 

“Nu’udar estudante, haree ba inunadasaun ne’ebé akontese, ami hakarak hatudu ami-nia solidaridade, ami mós apoiu ona nesesidade balun, no ikus ami rona katak balun hela fatin laiha ona, ne’e mak ami konstrui fatin provizóriu ida ba sira iha ne’e, no estudante FECT ne’ebé hela iha Dormitóriu mak apoiu konstrui uma refere”, tenik Ajino.

 

Estudante ne’e mós hatutan, konstrusaun uma refere oras ne’e atinji ona 75%, no garante katak sei finaliza iha tempu besik atu nune’e vítima sira bele uza ona.

 

Totál refujiadu ne’ebé antes ne’e mai hela iha Rezidensia Kongregasaun Kanosianu iha Hera, hamutuk uma-kain hitunulu resin, maibé balun fila ona ba sira-nia hela fatin, no hirak ne’ebé sei hela hamutuk uma-kain haatnulu resin, tanba sira nia hela fatin hetan estraga totál husi inundasaun.

 

Média UNTL : Agostinho da Cruz e Silva

Foto : Agostinho da Cruz e Silva