UNTL HALO ONA ABERTURA TINAN LETIVU 2021 NO ENSINU-APRENDIZAJEN BELE LA’O HO “ONLINE”

Escrito por Mateus Goncalves Visualizações: 4654
Universidade Nacional Timor Lorosa’e (UNTL) nia Visereitór ba Asuntu Akadémiku no Garantia Kualidade (VRAAGK), Profesór Doutór Samuel Venâncio de Sousa Freitas, iha Kampus Sentrál UNTL nian Díli (11/04), hateten katak hahún ba abertura tinan letivu 2021 nian, iha 8 Abril liubá, fó ona marka inísiu ba estudante foun sira bele partisipa aula distánsia iha semestre impár nian.
 
“Aula distánsia atu la’o di’ak tenki iha koordenasaun di’ak entre dosente ho estudante tanba iha iha loron 8 Abril liubá Magnifiku Reitór, Profesór dr. João Soares Martins MPH, Ph.D, hamutuk ho estrutura halo ona abertura ba tinan letivu 2021 nian, signifika ita sei envolve estudante foun iha aula distánsia” tenik Visereitór.
 
Visereitór ne’e mós hatutan importante liu mak rekolla uluk númeru telefone husi estudante sira hodi bele fasilita dosente sira komunika no konvoka ba aula, maibé kabe ba Departamentu no Fakuldade idaidak nia maneira, atu realiza prosesu aprendizajen liuhusi aula distánsia
Iha sorin seluk, Dekanu Interinu Fakuldade Siénsia Ezata (FCE), Profesór Romualdo Lopes, hateten katak FCE hahú ona no rekolla númeru kontatu husi estudante sira dezde inisiu inskrisaun iha Kampus Sentrál.
“Ami-nia Fakuldade bainhira hahú inskrisaun iha Kampus Sentrál nian, orienta ona ami-nia asosiasaun sira, hodi preve katak sei akontese aula online tanba ne’e momentu ne’ebá ami rekolla kedas enderesu kontatu estudante sira-nian no dadaun ne’e prosesu aprendizajen la’o ona” tenik Dekanu Interinu.
 
Profesór Romualdo mós hatutan katak estudante rejistadu hamutuk na’in 93 husi totál 116 ne’ebé pasa ba FCE no dadaun ne’e, na’in neennulu resin mak partisipa hela aula distánsia.
 
Enkuantu Dekanu Fakuldade Direitu nian, Profesór Isidoro Viana, hateten katak nia Fakuldade seidauk rekolla hotu lista kontatu estudante foun sira-nian no prosesu ensinu anu-zero nian sei hahú iha fulan Maiu.
 
“Ami seidauk iha lista kompletu husi estudante foun no sira ne’e sei tama ba ano-zero, sira-nia prosesu aprendisazen sei hahú iha loron 30 maiu mai, tanba presiza mós sira-nia prezensa iha universidade atu estrutura no Fakuldade sira bele nomos dosente sira bele koñese di’ak liután bainhira Serka-Sanitária remata” tenik Dekanu.
 
Média UNTL 📝 : Agostinho da Cruz e Silva
Foto 📷 : Agostinho da Cruz e Silva & Arkivu FCE