UNTL HO IPG DISKUTE PROSESU ESTABELESIMENTU LNG

Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins MPH, Ph.D, akompaña husi Visereitór, Proreitór, Dekanu ho Visedekanu sira husi Fakuldade Enjeñaria Siénsia no Teknolojia (FEST) nian, partisipa iha diskusaun ba estabelesimentu Laboratóriu Nasionál Jeolojia (LNG), iha Resintu Hera, Díli.
 
“Agradese tebes ita bele mai hamutuk iha ne’e, hodi buka solusaun, ha’u foin haree iha livru ne’e ita-nia konkordánsia komesa iha tinan 2012, iha diskusaun barak maibé seidauk halo instalasaun, ne’e mak ohin ita marka enkontru ida ne’e atu aselera prosesu ne’e”, tenik Reitór, iha Salaun Hotel Novo Turismu (9/04).
 
Reitór mós hatutan katak, fatin UNTL iha FEST-Hera disponivel ba atu instala laboratóriu ne’e, no sei benefísia ba universidade liuliu Departamentu Jeolojia no Petróleu, nune’e mós ba Timor-Leste iha futuru.
 
Iha fatin hanesan, Presidente Institutu Petroléu no Jeolojia (IPG), Profesór Gabriel Aparício, dezeja katak, liuhusi sorumutu refere bele hamosu rezultadu ruma relasiona ho planu ba estabelesimentu Laboratóriu Nasionál Jeolojia iha Timor-Leste.
 
“IPG iha difikuldade barak liuliu fatin, ohin dader ita mai hamutuk iha ne’e haree liuliu prosesu atu harii LNG iha FEST-UNTL Hera, no ita nia hamutuk bele desidi asuntu ne’ebé di’ak ba IPG, di’ak ba universidade no di’ak ba nasaun”, tenik Prezidente IPG.
 
Iha sorin seluk, S.E. Ministru Petroléu Rekusu no Minerais, Profesór Doutór Victor da Conceição Soares, hateten katak estabelese LNG importante atu bele fasilita estudante atu eleva kualidade no peskizadór sira hodi peskiza asuntu importante ba nasaun nian.
 
“Liuhusi estabelesimentu laboratoriu iha Hera mak sei benefísia estudante sira iha FECT nian nomós bele ajuda peskizadór sira iha IPG atu halo peskiza ba rekursu naturais no jeolojia nian iha futuru”, tenik Eis Dekanu FEST ne’e.
 
Governante ne’e mós husu ba UNTL no IPG, atu aselera prosesu ne’e hodi bele fasilita estudante no instituisaun iha futuru hodi mellora liután kualidade no produtividade Jeolojia iha Timor-Leste.
 
Partisipa iha diskusaun ne'e Visereitór, Proreitór sira, Dekanu Interinu FECT, Profesór Junior Raimundo da Cruz, Dr.Eng. ho nia Visedekanu sira, ekipa husi Ministériu Petroléu no Minerais, Ekipa husi IPG, no konvidadu sira.
 
Média UNTL 📝 : Agostinho da Cruz e Silva
Foto 📷 : Agostinho da Cruz e Silva