UNTL ho ACVLLN SENSIBILIZA KOÑESIMENTU FOIN SA’E NIAN KONA-BA VALÓR REZISTÉNSIA NIAN

Escrito por Mateus Goncalves Visualizações: 1006
119064471 3410600965627931 881321191876783418 n
#TimorLeste #UNTL #CEG #ACVLLN 10 Setembru 2020
Universidade Nacional Timor Lorosa’e (UNTL), nia Sentru Estudu Jéneru (CEG) ho Associação dos Combatente e Veteranos da Luta da Libertação Nacional (ACVLLN) realiza semináriu ho Tema ‘’Transformação dos Valores de Resistência no Desenvolvimento Nacional de Timor-Leste’’, iha Kampus Sentrál UNTL nian, Díli (08/08). Semináriu ne’e ho objektivu atu sensibiliza koñesimentu foin sa’e sira nian kona-ba valór rezisténsia nian.
 
Iha palestra sesaun dahuluk nian, oradór Dr. Roque Rodrigues enkoraja estudante sira nu’udar jerasaun ohin no futuru nian, atu buka aprende nafatin valór rezisténsia hodi bele kontribui ba dezenvolvimentu nasionál.
 
“Hadomi ita-nia nasaun mak pontu ne’ebé lori ita luta ba libertasaun nasionál, tanba ne’e, ha’u mós hola parte iha jerasaun 1975 nian, ohin loron ha’u mai atu partilla esperiénsia ba imi jerasaun ohin no futuru nian, atu buka aprende nafatin ho valór sira rezisténsia nian atu imi bele kontribui ba dezenvolvimentu nasionál”, hateten oradór.
 
Dr. Roque Rodrigues salienta tan katak, valór ida mós mak liberta povu, valór ne’ebé importante no reune ona forsa hotu timoroan nian, iha unidade nasionál hodi luta ba libertasaun nasionál.
Iha fatin hanesan, oradór daruak, Dr. Rui Maria de Araújo, iha nia diskursu kategoriza valór sira rezisténsia nian ba parte rua, hanesan valór determinante maka Pátria e Morte no klareza ho sentidu katak mate ka moris ukun rasik an, mak determinante ba luta.
 
“Valór daruak mak unidade hanesan modelu ne’ebé unifika forsa hotu luta nian, tantu rai laran no rai liur liuhusi frente armanda, klandestina no diplomasia, no ha’u haree husi unidade ne’e mak ita hotu ho firmeza iha luta hasoru invazór sira maské iha tortura oioin”, tenik Dr Rui.
 
Entretantu, Denilson Sávio Marques da Silva, estudante UNTL nian, hateten semináriu refere pertinente tebes ba akadémiku sira, ne’ebé hanesan jerasaun foun hodi refleta kona-ba tranformasaun valór rezisténsia.
 
"Sr. Roque Rodrigues ko’alia ‘’amar a pátria’’ signifika ita dedika ita-nia an tomak, no iha konseitu luta libertasaun povu no nasaun nian, bainhira ita hadomi ita-nia rain mak ita dedika ho responsabilidade tomak ba buat ne’ebé ita rasik hakarak", tenik Denilson.
 
Estudante ne’e mós reflete katak, nu’udar jerasaun foun presiza komprende valores rezisténsia no transforma-an hodi aplika ho estuda, peskiza i dedikasaun, tan joven mak ajente transformadór, ho asaun sira iha sosiedade.
 
Partisipa iha semináriu refere, Proreitór sira, Dekanu, Visedekanu sira, Diretór Sentru Estudu Jéneru nian, dosente ho estudante UNTL nian, no estudante husi Universidade Dili (UNDIL), inklui konvidadu sira.
 
Média UNTL 📝: Zita Menezes (estajiária), Rafael dos Reis (estajiáriu),
Foto 📷 : Rafael dos Reis (estajiáriu), Melania Panderosa (estajiária), Jacob Pinto Guterres (estajiáriu)