Universidade Nacional Timor Lorosa’e (UNTL), nia Fakuldade Filosófia (FF) liuhusi Departamentu Filozofia (DF) atribui sertifikadu ba partisipante na’in tolunulu resin lima (35) husi ensinu Sekundáriu 10 Dezembru ne’ebé partisipa ona iha formasaun kona-ba modelu organiza enkontru, lideransa no debate sientífiku durante fulan tolu.
Profesora Marcia Almeida Soares iha salaun eskola 10 Dezembru Komoro Dili, (29/08) apresia ho nia estudante sira ne’ebé konsege aplika sira-nia espíritu voluntarizmu hodi fahe esperiénsia ba estudante sira.
"Formasaun ne'e estudante UNTL hakarak mai fahe sira-nia koñesimentu ne’ebé sira aprende iha Universidade, di’ak tebes tanba sira ho espiritu voluntarismu atu ajuda estudante sira ne’e hodi aumenta sira-nia kapasidade”, tenik Profesora Marcia.
Iha fatin hanesan Diretór Ensinu Sekundáriu 10 dezembru, Profesór Domingos Gusmão, agradese ba formadór sira husi UNTL nia FF ne’ebé oferese estudante sira hodi fahe esperiénsia.
“Ami agradese ba formadór sira, tan fó ona tempu hodi fahe sira-nia espriénsia ba estudante sira iha nível sekundária ne’e, formasaun ne’e importante tanba ne’e, ami husu atu kontinua hodi prepara estudante sira-nia mentalidade hodi organiza atividade ruma”, hateten Diretór.
Entretantu, Ajor Domingos Amaral, nu’udar formador, hateten katak, formasaun refere atu bele aumenta liután estudante sira-nia kapasidade atu sai lideransa di’ak iha futuru.
"Formasaun ne'e fahe ba parte tolu ho konteúdu ne’ebé konsentra atu organiza enkontru ruma, sai lideransa di’ak no bele komprende lala’ok debate sientífiku nian ", hatutan Ajor.
Atividade formasaun nian hahú dezde fulan marsu, no para iha Estadu Emerjensia (EE), hafoin kontinua hikas iha EE datoluk nian i finaliza iha fulan agustu. Aleinde hala’o iha Díli realiza mós iha munisípiu seluk hanesan Viqueque, Ainaro no Ermera.
Média UNTL : João Bosco Alves (estajiáriu)
Foto : Agostinho da Cruz e Silva