#TimorLeste #UNTL #PPGP-UPDK 17 Agostu 2020
Universidade Nacional Timor Lorosa’e (UNTL), Programa Pós-Graduasaun i Peskiza (PPGP), nia Unidade Produsaun i Diseminasaun Koñesimentu (UPDK) lansa livru “Ensino de Biologia em Timor-Leste: Perspetivas Teóricas e Práticas”, iha Auditóriu Liceu (13/08).
Reprezentante Magnífiku Reitór nian, Proreitór Asuntu Kooperasaun, Profesór Doutór Eduardo Aniceto Serrão, hateten katak universidade iha pilar 3 mak ensinu, peskiza no dedikasaun ba komunidade tanba ne’e livru refere demonstra profesór sira-nia papel ho inovasaun.
“Livru ne’ebé ohin lansa sai produtu profesór sira-nian liuliu autór sira hodi fortifika ensinu, ne’e importante tebes, iha dezenvolvimentu no inovasaun koñesimentu”, tenik Profesór Eduardo.
Proreitór ne’e mós kongratula peskizadór sira, ne’ebé dedika an hodi tau hamutuk liafuan ho ideia sira ne’ebé konstitui prodús livru refere, hanesan motivasaun ba autór sira hodi kontinua nafatin dezenvolve ba oin obra foun sira.
Koordenadór PPGP-UPDK nian, Profesór Doutór Vicente Paulino, hateten katak liuhusi prosesu lubuk ida, autór ida-idak aprezenta sira-nia artigu iha kolókiu hafoin organiza hajunta transforma sai livru ida.
“Prosesu elaborasaun ami konvida ho profesór sira hodi aprezenta testu ho kolókiu ne’ebé reorganiza hodi transforma sai livru ida, durante tinan tolu”, tenik Profesór Vicente.
Profesór Pedro Soares, Ex-Dekanu Fakuldade Edukasaun, Arte no Umanidade (FEAH) no dosente husi Departamentu Ensinu Biolojia FEAH, nu’udar kontribuidór ba livru refere deskreve parte importante sira ensinu biolojia nian no dezeja bele sai referénsia ba leitór sira.
“Iha livru ne’e ho nia konteúdu kompostu husi parte tolu: ko’alia kona-ba Língua Portugés, Ensinu Biolojia, Ensinu Biolojia Kontestu Globalizasaun Kuríkulu, no Espasu Edukativu”, dehan Profesór Pedro.
Edisaun no publikasaun organiza husi UPDK no dezeñu husi Profesór Alexandro Tomas Barbosa, no apoiu husi Profesora Patricia Siraldi.
Partisipa iha lansamentu refere Dekana Fakuldade Edukasaunm Arte no Umanidade (FEAH), Profesora Doutora Ana Cristina Silveira Soares, autór sira, dosente, no estudante inklui konvidadu sira.
Média UNTL https://static.xx.fbcdn.net/images/emoji.php/v9/tcc/1/16/1f4dd.png?_nc_eui2=AeHNRnu6O-mFGH2F8JmiGizQVsm2fAeLPjtWybZ8B4s-OxtsxO76r825ZcBhjIq7ri8")">📝: Jacob Pinto Guterres (estajiáriu)
Foto https://static.xx.fbcdn.net/images/emoji.php/v9/tde/1/16/1f4f8.png?_nc_eui2=AeELjkXV1sPv8LiE0NicgOkAAuijk7k2TP8C6KOTuTZM_yyM9E-2HVDSEPzDSgCwhYE")">📸 : Jacob Pinto Guterres & João Bosco (estajiáriu)