#TimorLeste #UNTL 19 marsu 2020
Universidade Nacional Timor Lorosa’e (UNTL) nia Dekanu Fakuldade Medisina I Siénsia Saúde (FMSS), iha Kampus Kaikoli UNTL nian, Díli Profesór José Deonisio Xemenes hateten katak númeru estudante ne’ebé aprovadu ba nia fakuldade hamutuk na’in 532 bazeia ba proposta fakuldade iha tinan akadémika 2020 nian.
“Tinan ne’e ami esforsu nafatin hatudu melloramentu jestaun ba saladeaula, númeru profesór, oráriu no rekursu sira ne’ebé pertinente ba prosesu aprendizajen iha fakuldade nian, tantu ba estudante foun no tuan sira la’o ho di’ak”, hatutan Dekanu.
Profesór Ximenes husu ba estudante sira atu uza oportunidade no tempu iha FMSS hodi estuda, no estuda i aprende barak liután hodi sai profesional ne’ebé sei serbí komunidade iha área saúde nian.
Entretantu Dekanu Fakuldade Ekonomia no Jestaun (FEJ) Profesór Custódio Barrata Ximenes katak FEJ saladeaula ualu (8), projetór sanulu resin (15) no sufisiente hodi akumula estudante foun no tuan sira prosesu aprendizajen.
“Fakuldade nia rekursu sufisiente, inklui dosente sira mós prontu no ami-nia aula la’o di’ak, hahú husi tuku hitu dader to’o tuku neen lokraik ba estudante tuan no estudante foun sira”, dehan Dekanu FEJ
Iha fatin seluk Dekanu Fakuldade Siénsia Sosiál (FSS) nian Mestre Camilo Ximenes Almeida informa mós katak fasilidade sira atu fasilita estudante foun sira sufisiente hanesan saladeaula, projetór inklui númeru dosente.
“Iha fakuldade ne’e, ita-nia karteira sufisiente, no iha aula balun mak ki’ik, maibé ami koko fahe ona ba turma hodi akomoda estudante hotu, no fakuldade mós nafatin monitoriza prosesu aprendizajen tuir oráriu ne’ebé fó sai ona”, dehan dekanu FSS
Média UNTL : Isac Oliveira Freitas, Miguel Gonçalves
Foto : Agostinho da Cruz e Silva, Moises do Rego, Miguel Gonçalves