#TimorLeste #UNTL 18 marsu 2020
Universidade Nacaionl Timor Lorosa’e (UNTL) nia sivitas akadémika ne’ebé kompostu husi estudante, dosente no funsionáriu hala’o limpeza iha (17-18 marsu) iha área hirak ne’ebé afetadu ba inundasaun ne’ebé akontese iha parte leste kapitál Díli nian hanesan Bekora, Becusse, Taibesi, Kuluhun no Balide.
Relasiona ho atividade refere, Administradór Jerál UNTL nian Sr. Lourenço Rodrigues Pereira iha Kampus Sentrál UNTL nian, Díli hateten katak universidade nasionál hola parte limpeza bazeia ba sirkulár ne’ebé Governu Emita iha segunda-feira ne’e.
“Bazeia ba sirkulár Governu nian maka loron rua 17 no 18 marsu ne’e, UNTL nia estudante, dosente no funsionáriu sira iha toleráriu atu hala’o limpeza iha lokál ne’ebé afetadu ba inundasaun”, dehan AJ.
Administradór Jerál hatutan tan katak atividade ne’ebé hala’o universidade nasionál nia pozisaun mak atu kontribui ba mantein Kapitál Dili livre husi lixu no inundasaun.
Média UNTL: Miguel Gonçalves
Foto: Agostinho da Cruz e Silva, Miguel Gonçalves